अंबिकापुर, 3 नवंबर 2020। कलेक्टर संजीव कुमार झा के निर्देशानुसार जिला प्रशासन सरगुजा के लोगन के समस्या मन के संवेदनशीलता के संग समाधान करे जावत हे। इही कड़ी म अम्बिकापुर जनपद के ग्राम केशवपुर निवासी दिव्यांग सुरेश मानिकपुरी के आवेदन म त्वरित कार्यवाही करत हुए आवेदन दे के 24 घंटा के अंदर ही जनपद पंचायत द्वारा जॉब कार्ड तैयार करके मनरेगा म मेट के काम दिलाए गिस। सुरेश अब मनरेगा कार्य स्थल के संग ही गोठान म श्रमिक मन ल पानी पिलाए अउ मेट के काम करही, जेखर बर ओला 190 रुपिया प्रतिदिन के दर ले मजदूरी मिलही। जॉब कार्ड ले रोजगार मिले ले सुरेश के चेहरा म खुशी झलक उठिस अउ वो जिला प्रशासन ल एखर बर धन्यवाद दीस।
केशवपुर निवासी करीब 34 वर्षीय अउ शत प्रतिशत दिव्यांग श्री सुरेश मानिकपुरी ह बतइस कि परिवार म पत्नी के अलावा एक पुत्र हे जेखर भरण पोषण मां ल मिलत परिवार पेंशन के राशि ले होवत हे। कोनो काम-धंधा नइ होए ले ओमन ल परिवार चलाए म बिक्क्ट परेशानी होवत रिहिस। अब मनरेगा म काम मिल जाए ले परिवार के भरण-पोषण म वो घलो सहभागी बन सकही। सुरेश बताथे कि वो गांव के ही स्कूल ले कक्षा आठवीं पास हे। हाई स्कूल दूर होए के सेती आगु के पढ़ाई नइ कर पाइस। परिवार के भरण पोषण म हाथ बंटाए बर छोटे-मोटे दुकान खोले के घलो ईच्छा होइस लेकिन आर्थिक स्थिति अउ अनिश्चितता के सेती जोखिम नइ लेव। ओमन बतइस कि अपन दैनिक कार्य बर आए-जाए बर प्रशासन द्वारा कुछ बछर पूर्व ट्राई सायकल उपलब्ध कराए गए रिहिस। पुराना अउ मैनुअल होए के सेती एखर ले आए-जाए म परेशानी होथे। मोटराइज्ड ट्राईसायकल मिले ले ओमन ल आसानी होही।
जनपद पंचायत अम्बिकापुर के सी.ई.ओ. एस.एन. तिवारी ह बतइस कि केशवपुर निवासी सुरेश मानिकपुरी के आवेदन म तत्काल कार्यवाही के निर्देश कलेक्टर द्वारा देहे गए रिहिन जेखर परिपालन म जॉब कार्ड तैयार करके मनरेगा म मेट के काम देहे गए हे।
