सैनिक मन के कलाई म ए पइत सजही छत्तीसगढ़ के राखी, बहिनी मन भेजिन मया अउ सम्मान

महासमुंद के आंगनबाड़ी कार्यकर्ता अऊ महतारी वंदन के हितग्राही मन के अनोखा पहल
महासमुंद, रक्षाबंधन के ए पावन पर्व म महासमुंद के बहिनी मन ह एक अनोखा मिसाल पेश करे हे। आंगनबाड़ी कार्यकर्ता अऊ महतारी वंदन योजना के लाभार्थी माता-बहन मन ह अपन हाथ ले राखी बनाके देश के सीमा के रक्षा करइया वीर सैनिक मन ल भेजे हें। जानबा हे के ये रक्षाबंधन के पावन पर्व म जब देश के कोना-कोना ले राखी जाही, त महासागर के ये राखी सैनिक मन बर खास होहीं, काबर के एमन म न केवल धागा हे, बल्कि छत्तीसगढ़ के माता-बहिनी मन के सच्चा स्नेह अऊ सम्मान घलो बंधाए हे। महासमुंद शहरी सेक्टर 01 के आंगनबाड़ी कार्यकर्ता श्रीमती राखी दुबे ह बताइस के ये सिर्फ एक राखी भर नो हे, बल्कि ए भरोसा के धागा हे, जेन हमन ल अपन सैनिक भाई मन ले जोड़े हे।
बहिनी मन ह कहिन के रक्षाबंधन केवल घरे म ही नहीं, बल्कि सीमा म तैनात जवान मन के संग घलोक मनाए जाना चाही, काबर के वो मन असली रक्षक हें। जब सैनिक मन के कलाई म ये राखी बांधे जाही, त ओ मन घलोक खुद ल अपन परिवार ले जुड़े महसूस करहीं। ए अवसर म वार्ड संख्या 10 के पार्षद श्री माखन पटेल, पूर्व पार्षद श्रीमती शोभा शर्मा, महिला अउ बाल विकास विभाग के जिला कार्यक्रम अधिकारी श्री टी. जटवार, पर्यवेक्षक श्रीमती शीला प्रधान, नगर पालिका के सीओ श्रीमती ममता बग्गा, आंगनबाड़ी सहायिका भानमती साहू, अउ वीणा महिला समिति के सदस्य श्रीमती सरला वर्मा, अनिता बिसेन सहित कईठन माता अउ बहिनी शामिल रहिन।
कार्यक्रम म उपस्थित सबो मन ह ए उदीम के सराहना करिन अऊ कहिन के आंगनबाड़ी केंद्र अब सिर्फ लइका मन के देख-रेख के स्थान नो हे बल्कि समाज म संवेदनशीलता, देश-प्रेम अऊ संस्कार के केंद्र बनत जात हे।