पुलिस ल देखतेच चोर भाग के छत ले कूदिस: कनिहा टूटिस, पुलिस करिस गिरफ्तार

बिलासपुर, तिफरा के रामावर्ल्ड म रहइया विवेक गोयल ह रिपोट लिखाए रहिस के बीते रात जब ओखर नींद खुलिस, त वो ह देखिस के बेडरूम के दरवाजा खुले हे अऊ बेडरूम म रखे आलमारी खुल्‍ला हे, सब्‍बो सामान बगरे हे। आलमारी म रखे 5.80 लाख रूपिया अऊ सोना-चांदी के जेवर चोरी हो गए। घटना के रिपोट के बाद सिरगिट्टी पुलिस ह आरोपी के तलाश शुरू करिस, त पता चलिस के आरोपी सून्‍ना मकान म लुकाए हे। पुलिस मौका म पहुंचिस, त मकान म लुकाए चोर ह पुलिस ल देख के भागत छत ले कूद दीस। एमा ओकर कनिहा टूट गे, पुलिस ह ओला गिरफ्तार कर लेहे हे। पुलिस ह आरोपी तीर ले 5.80 लाख नकदी अऊ 3 लाख के सोना- चांदी के जेवर जब्त करे हे। आरोपी दूसर राज्य भागे के फिराक म रहिस, ओखर पहिलिच पुलिस ह ओला धर लीस।
आरोपी राहुल गंधर्व छत ले कूदके भागे लगे रहिस, छत के ऊंचाई ले कूदे म ओखर कमर म गंभीर चोट आइस। पुलिस के मुताबिक सोना के मंगलसूत्र, सोना के चैन, सोना के झुमका, चांदी के हटरी, चांदी के कटोरी, चांदी के गिलास समेत 8.80 लाख रू के सामान चोरहा मेर ले बरामद करे गए हे। चोरहा ल अस्पताल लेजे गीस, जिहां वोकर इलाज जारी हे।