मुख्यमंत्री ह तियारी मन के लीन जायजा
रायपुर, 02 सितम्बर 2024। ‘‘विष्णु भइया संग तीजा-पोरा महतारी वंदन तिहार’’ खातिर मुख्यमंत्री श्री विष्णु देव साय के रायपुर निवास सज-धज के तियार हे। मुख्यमंत्री निवास म दू सितम्बर के मंझन 11 बजे ले 1 बजे तक तीजा-पोरा महतारी वंदन तिहार के आयोजन होही। मुख्यमंत्री श्री विष्णु देव साय ह काली संझा अपन निवास म तिहार के तियारी मन के जायजा लीन। उमन पहुना मन के बैठक व्यवस्था, पूजा स्थल, मंच आदि व्यवस्था ल देखीन। ये बेरा म वित्त मंत्री श्री ओ.पी. चौधरी, मुख्यमंत्री के सचिव श्री पी. दयानंद अउ श्री बसवराजु एस. घलो उपस्थित रहिन।
मुख्यमंत्री निवास के छत्तीसगढ़ के परम्परा अउ रीति-रिवाज के मुताबिक साज-सज्जा करे गए हे। रंग-बिरंगा तोरन अउ फूल ले आयोजन स्थल ल सजाए गए हे। माटी के सुग्घर नंदिया बइला पोरा चुकिया जांता ले पूजा स्थल ल सजाए गए है। इहां भगवान शंकर अउ नंदिया बइला के सुघर प्रतिमा बनाए गए हे।
