महासमुंद, स्वतंत्रता दिवस (15 अगस्त 2022) ल भारत के आजादी के 75वां वर्षगांठ ‘‘आजादी के अमृत महोत्सव’’ बर पूरा जिला उत्साहित हे। एला लेके महासमुंद जिला म हर घर तिरंगा अभियान के तैयारी घलोक जोर-शोर ले करे जात हे। जिला म पहली पईत स्व सहायता समूह के दीदी मन तिरंगा तियार करत हें। एमां बागबाहरा विकासखण्ड के गणेश, गायत्री स्व सहायता समूह, पिथौरा के संस्कार अऊ गायत्री समूह, महासमुंद के कृष्णा अऊ माया स्व सहायता समूह, सरायपाली ब्लॉक के भगवती अऊ गंगा समूह के दीदी मन अऊ बसना विकासखण्ड के सरस्वती, जय मॉ दुर्गा (सागरपाली) अऊ जय मॉ दुर्गा (बंसुला) के संग गंगा स्व सहायता समूह के एक दर्जन समूह के महिला (दीदी) मन तिरंगा के सिलाई के काम करत हें। अभी हाल म समूह के महिला मन ल ढाई हजार तिरंगा झण्डा सिले के ऑर्डर मिले हे। कई विभाग कोति ले अऊ तिरंगा झण्डा बनाए के ऑर्डर देहे जात हे। ये सबो दीदी मन भारतीय झण्डा संहिता के तहत 2002 के दिशा-निर्देश के मुताबिक झण्डा सिलाई के काम करत हें।
कलेक्टर श्री निलेशकुमार क्षीरसागर कोति ले 13 ले 15 अगस्त तक हर घर म राष्ट्रीय ध्वज फहराए अऊ ये अभियान म जनभागीदारी के पहल सुनिश्चित करत एला लोकप्रिय बनाए बर सबो प्रयास करे जात हे। एखर सफलता बर विशेष प्रचार-प्रसार अभियान के शुरुआत करे जात हे। स्कूली छात्र मन प्रभात फेरी घलोक निकालहीं।
जिला प्रशासन के मुताबिक हर घर तिरंगा अभियान ल सफल बनाए बर स्कूल, कॉलेज म कई ठन प्रतियोगिता निबंध प्रतियोगिता, बाईक रैली संग आन जागरूकता कार्यक्रम आयोजित करे के पहल करे जात हे। शहरी अऊ ग्रामीण क्षेत्र मन म हर घर ल तिरंगा अभियान ले जोड़े जाही। जिला प्रशासन कोति ले समाज सेवी संगठन मन ले सम्पर्क करके गरीब अऊ दिव्यांग मन ल निःशुल्क झण्डा देहे के प्रयास करे जात हे।
