खरीफ विपणन साल 2025-26 म 31 जनवरी तक होही धान खरीदी
रायपुर, खरीफ विपणन साल 2025-26 म प्रदेश म धान उपार्जन प्रक्रिया ल सुचारू अऊ पारदर्शी रूप ले संचालित करे खातिर राज्य शासन कोति ले धान खरीदी 15 नवंबर 2025 ले 31 जनवरी 2026 तक निरधारित करे गए हे। लगभग 50 दिन म खरीदी काम पूरा करे के लक्ष्य रखे गए हे। किसान मन के सुविधा खातिर पहिली जइसे ए साल घलोक टोकन जारी करके धान खरीदी करे जात हे।
टोकन तुहर हाथ मोबाइल ऐप के माध्यम ले टोकन उपलब्ध
राज्य शासन के निर्देश के मुताबिक किसान मन के जमीन धारिता के आधार म टोकन जारी करे जात हे। 2 एकड़ तक जमीन वाले किसान मन ल एक टोकन, 2 ले 10 एकड़ तक जमीन वाले किसान मन ल 2 टोकन अऊ 10 एकड़ ले जादा जमीन वाले किसान मन ल 3 टोकन जारी करे जात हे। जानबा हे के किसान टोकन उपार्जन केंद्र ले सीधा प्राप्त कर सकत हें या टोकन तुहर हाथ मोबाइल ऐप के माध्यम ले खुद टोकन ले सकत हें। ये मोबाइल ऐप गूगल प्ले स्टोर म उपलब्ध हे।
शिकायत अऊ सुझाव खाद्य विभाग के टोल-फ्री नंबर 1800-233-3663 म
एखर अलावा धान खरीदी ले संबंधित शिकायत अऊ सुझाव खाद्य विभाग के टोल-फ्री नंबर 1800-233-3663 म दर्ज कराए जा सकत हे। एखर संगेच जिला म अपर कलेक्टर के अध्यक्षता म इंटीग्रेटेड कमांड एंड कंट्रोल सेंटर अऊ कॉल सेंटर के गठन करे गए हे, जेन धान के रीसाइक्लिंग म रोक, कोचिया/बिचौलिया के गतिविधि मन के निगरानी अऊ धान के उठाव अऊ परिवहन के सरलग मॉनिटरिंग ठउका करत हे।
प्रशासन ह अपील करे हे के उपार्जन केंद्र म धान लात बेरा किसान-धान ल बने सहिन सुखाके लावंय, जेमां नमी 17 प्रतिशत ले जादा नइ होना चाही, धान साफ-सुथरा अऊ अशुद्धि मुक्त होना चाही। संगे टोकन, किसान पुस्तिका अऊ आधार कार्ड जरूर रखंय। जिला प्रशासन ह किसान मन ले सहयोग के अपील करत कहिन के निरधारित निर्देश के पालन करत समय म धान विक्रय करव, जेखर से खरीदी काम सुचारू अऊ बाधारहित पूरा करे जा सकय।
