मुख्यमंत्री कैंप कार्यालय बगिया बनिस मनखे मन के भरोसा के ठीहा
रायपुर, 06 सितंबर 2024/ मुख्यमंत्री श्री विष्णु देव साय आम नागरिक मन के समस्या मन ल लेके अड़बड़ेच संवेदनशील हे, एकरे सेती लोक कल्याण के काम मन म तेजी आए हे अउ तुरंते समय म समाधान घलोक मिलत हे। आमजन के समस्या मन के जल्दी निराकरण होए ले मनखे मन म बहुत उत्साह हे।
मुख्यमंत्री के निर्देश म सरकारी अमला आम आदमी ल राहत पहुंचाए खातिर पूरा सक्रिय हे। दिन होवय या रात समय के परवाह करे बिना समस्या के जल्दी निराकरण करे जात हे। बिजली के समस्या ले जूझत पत्थलगांव क्षेत्र के कुछ ग्रामीण इलाका मन ल आधा रात के घलोक मुख्यमंत्री कैंप कार्यालय म भेजे एक व्हाट्सऐप मैसेज ले राहत मिल गए हे।
पत्थलगांव के सुरेशपुर, बहनाटांगर, सुसडेगा, मुड़ेकेला ग्रामीण क्षेत्र म बिजली समस्या ले जूझत गांव वाले मन ह बिरसपतवार के दरमियानी रात मुख्यमंत्री कार्यालय म व्हाट्सअप मेसेज के जरिये बिजली गुल रहे सम्बन्धी समस्या के जानकारी भेजिन। कैंप कार्यालय के निर्देश म आधा रात के बिजली कर्मचारी मन ल क्षेत्र म बिजली सुधार काम करवाके बिजली ल सुचारू रूप ले चालु करे गीस। बगिया स्थित सीएम कैम्प कार्यालय के माध्यम ले एक व्हाट्सअप मेसेज म समाधान मिले म नागरिक मन ह प्रसन्नता जाहिर करत मुख्यमंत्री श्री विष्णुदेव साय के प्रति आभार जताए हें।
बगिया स्थित सीएम कैम्प कार्यालय म अब तक जशपुर संग आन जिला मन के बिजली व्यवस्था, राशन व्यवस्था, स्वास्थ्य लाभ, दिव्यांग व बुजुर्ग पेंशन संबंधित अउ आन जम्मो समस्या मन के समाधान के आस लेके पहुंचइया हजारों मनखे मन ल अब तक तुरंते राहत पहुंचाए जात हे। जानबा हे के मुख्यमंत्री श्री विष्णु देव साय ह राज्य के नागरिक मन ल बेहतर सुविधा मुहैया कराए बर अइसन व्यवस्था बनाय हे के आम नागरिक अपन समस्या के समाधान बर सीएम कैम्प कार्यालय के टोल फ्री नंबर 07764-250061, 07764-250062, 07764-250068 म घर बइठे कॉल कर सकत हे। कॉल करे म उंखर समस्या के समाधान बर तुरंते कार्यवाही करे जाथे।