मुख्यमंत्री सामिल होइन मराठा सेवा संघ के स्थापना दिवस समारोह म
महासमुंद जिला के नर्रा गांव म स्थित छत्तीसगढ़ के पहिली मराठा शासक श्री बिम्भाजी राव भोसले के समाधि स्थल के होही सौंदर्यीकरण
आन समाज के जइसे मराठा सेवा संघ ल घलोक कलेक्टर गाइडलाइन दर के 10 प्रतिशत कीमत म देहे जाही जमीन
रायपुर, मुख्यमंत्री श्री भूपेश बघेल ह आज राजधानी रायपुर म आयोजित मराठा सेवा संघ के स्थापना दिवस समारोह ल संबोधित करत कहिन कि छत्तीसगढ़ अऊ विदर्भ के बहुत जुन्ना संबंध रहे हे। भौगोलिक, राजनीतिक दृष्टि के संगें-संग सामाजिक स्तर म घलोक महाराष्ट्र के संग छत्तीसगढ़ के मनखे मन के रोटी-बेटी के संबंध हे। अवइया समय म ये संबंध अऊ जादा प्रगाढ़ होही।
मुख्यमंत्री श्री बघेल ह छत्तीसगढ़ के महासमुंद जिला के नर्रा गांव म स्थित छत्तीसगढ़ के पहिली मराठा शासक श्री बिम्भाजी राव भोसले के समाधि स्थल के सौंदर्यीकरण कराए के घोषणा करिन। उमन कहिन कि ये समाधि जर्जर स्थिति म हे। एकर सौंदर्यीकरण उंखर प्रतिष्ठा के मुताबिक करे जाही। मुख्यमंत्री ह मराठा संघ के सामाजिक भवन बर जमीन उपलब्ध कराए के मांग म कहिन कि मराठा सेवक संघ ल घलोक आन समाज के जइसे कलेक्टर गाइडलाइन दर के 10 प्रतिशत मूल्य म भूखंड उपलब्ध कराए जाही। रायपुर के कचना म आयोजित ये कार्यक्रम म मराठा सेवा संघ के राष्ट्रीय अध्यक्ष श्री कामाजी पवार, संस्थापक अध्यक्ष श्री पुरूषोत्तम खेडे़कर, प्रदेश अध्यक्ष श्री रविन्द्र दानी, पूर्व विधायक श्रीमती लकीर ताई, पूर्व मराठा शासक श्री बिम्बाजी भोंसले के परिजन श्री मधोजी भोसले अऊ श्रीमती मंगला दानी संग संघ के बहुत अकन पदाधिकारी अऊ सदस्य उपस्थित रहिन।
