जांजगीर-चांपा, 01 मई 2021। स्वास्थ्य के प्रति जागरूकता, समय म इलाज अऊ दृढ़ इच्छाशक्ति होही त हर बीमारी ले निजात पाए जा सकत हे। एला साबित कर देहे हे जांजगीर-चांपा जिला के बलोदा ब्लाक के ग्राम जर्वे (च) के पूर्णिमा कश्यप ह। बलोदा विकास खंड के कोविड केयर सह अस्पताल महुदा( ब) म पाछू 15 अपरेल के बलोदा ब्लॉक के ग्राम जार्वे (च )के अनिल कश्यप अऊ उंखर पत्नी पूर्णिमा कश्यप कोरोना पाज़ीटिव होए म इलाज बर भर्ती होइन। पूर्णिमा कश्यप के ऑक्सीजन लेवल 72 प्रतिशत रहिस। आक्सीजन के कमी के सेती ओ ल सांस लेहे म एतका तकलीफ रहिस। वो सुत घलोक नइ पात रहिस। ओकर धड़कन बहुत तेज़ चलत रहिस। पूर्णिमा के हालत बहुत गंभीर रहिस। अनिल ह सामान्य संक्रमित रहिस। पूर्णिमा के गंभीर हालात ल देख के ओ ल डॉ रामायण सिंह, बीपीएम पार्थ सिंह , आरएमए डॉ नील सागर यादव, वीरेंद्र केसरवानी, के के देवांगन , स्टाफ नर्स श्वेता सिंह, संतोषी जगत, बबीता जोगी, वार्ड बॉय वीर सिंह, प्रकाश यादव, स्वीपर अशु महंत, लक्ष्मण के टीम ह तुरंते इमरजेंसी इलाज़ के तैयारी शुरु करिस। जरूरी कोविड गाइड लाइन के मुताबिक इलाज शुरू होइस। जरूरत मुताबिक ओकर आक्सीजन मैंटेन करके, खाना , सफाई आदि के पूरा व्यवस्था करके ओखर समर्पित भाव ले उमन इलाज करिन। सरलग ऑक्सीजन मैंटेन करे, दवई-इंजेक्शन, आई-वी देहे गीस। डॉक्टर अऊ उंखर टीम के मेहनत अऊ पूर्णिमा के स्वस्थ होए के दृढ़ इच्छाशक्ति के आगू कोरोना ह घुटना टेक दीस अऊ पूर्णिमा सामान्य अवस्था म आ गीस।
वृहद आनलाईन छत्तीसगढ़ी-हिन्दी शब्दकोश की कड़ी-
https://dictionary.gurturgoth.com
26 अपरेल के बिना ऑक्सीजन मशीन के पूर्णिमा के आक्सीजन लेवल 97-98 प्रतिशत आ गीस। स्वस्थ होए म वोखर पति जऊन सामान्य लक्षण के रहिस, ओ घलोक समय म मिले उपचार ले स्वस्थ हो गे, दुनों ल पाछू 26 अप्रेल के एके संग डिस्चार्ज कर दे गीस। उमन कहिन के समय म इलाज अऊ दृढ़ इच्छाशक्ति ले कोरोना ले निश्चित रूप ले मुक्त होके स्वस्थ होय जा सकत हे।
सामयिक चिकित्सा अऊ दृढ़ इच्छाशक्ति ले कोरोना ल पूर्णिमा कश्यप ह हराइस
