उज्जैन अऊ काशी के तरज म बनही राजिम कॉरीडोर, केंद्र ले मांगे गीस सहयोग
ऐतिहासिक धरोहर मन के संरक्षण बर केंद्रीय बजट ले राशि देहे के करिन गिलोली
रायपुर, 31 जनवरी 2024। छत्तीसगढ़ के पर्यटन व संस्कृति मंत्री श्री बृजमोहन अग्रवाल ह आज नई दिल्ली म केंद्रीय पर्यटन मंत्री श्री जी. किशन रेड्डी ले मुलाक़ात करिन। ए बेरा म उमन छत्तीसगढ़ के पर्यटन विकास के संभावना उपर चर्चा करत छत्तीसगढ़ के ऐतिहासिक धरोहर मन के संरक्षण अऊ विकास बर केंद्रीय बजट ले राशि स्वीकृत करे के आग्रह करिन। श्री अग्रवाल ह शक्तिपीठ परियोजना के अंतर्गत प्रदेश के पाँच शक्तिपीठ मन ल जोड़े अउ विकसित करे, राजिम कॉरीडोर के निर्माण के संग पुरखौती मुक्तांगन म कन्वेन्शन सेंटर बनाए बर केंद्र ले सहयोग मांगिन।
केंद्रीय मंत्री ले ऊंखर कार्यालय म मुलाक़ात के समय संस्कृति मंत्री श्री बृजमोहन अग्रवाल ह बताइन कि छत्तीसगढ़ म अभी हाल म कुल 63 राज्य संरक्षित स्मारक हे। संरक्षित स्मारक, अवशेष, पुरास्थल अऊ संग्रहालय मन के अनुरक्षण अऊ विकास काम संग पुरातात्विक गतिविधि मन के संचालन बर 1965 लाख के राशि के प्रस्ताव तैयार करे गए हे। उमन केंद्रीय बजट ले स्वीकृत कराए के अनुरोध करिन।
मंत्री श्री बृजमोहन अग्रवाल ह उज्जैन अऊ काशी म बनाये गए भव्य कॉरीडोर के जइसे राजिम मंदिर परिसर ल विकसित करे, विकास काम मन अउ जीर्णोंद्धार के जरूरत बताईन। उमन केंद्रीय मंत्री ले राजिम मंदिर परिसर ल भव्य आकर्षक अऊ गरिमामय ढंग ले विकसित करे बर कॉरीडोर बनाए बर 75 करोड़ के राशि स्वीकृत करे के मांग करिन।
मंत्री श्री अग्रवाल ह बताइन कि छत्तीसगढ़ के कला अऊ संस्कृति ल बढ़ावा देहे बर 2006 म तत्कालीन राष्ट्रपति डॉ ए.पी.जे. अब्दुल कलाम ह पुरखौती मुक्तांगन के लोकार्पण करे रहिन। देश-विदेश ले अवइया लोक कलाकार अऊ अतिथि मन के संग संवाद स्थापित करे बर एक कन्वेन्शन सेंटर के जरूरत बहुत दिन ले महसूस करे जात हे। उमन एखर बर 50 करोड़ के राशि स्वीकृत करे के आग्रह करिन।