रायपुर, संस्कृति मंत्री श्री अमरजीत भगत ह कहिन कि छत्तीसगढ़ के संस्कृति अऊ पर्यटन ल देश-विदेश म पहिचान मिलही। श्री भगत ह कहिन कि छत्तीसगढ़ म फिल्म ल उद्योग के दर्जा मिलही। एखर से छत्तीसगढ़ के कलाकार मन ल काम मिलही। उमन कहिन कि छत्तीसगढ़ म फिल्म सिटी बनाए के काम शुरू हो गए हे। इहां फिल्म सिटी बन जाय ले छत्तीसगढ़ संग देश के आन प्रदेश मन के घलोक फिल्म बनही। उमन छत्तीसगढ़ के पर्यटन ल बढ़ावा दे बर ऐतिहासिक, धार्मिक, पुरातात्विक अऊ प्राकृतिक महत्व के दर्शनीय स्थल मन बर बेहतर आवागमन अऊ ठहरे के सुविधा बढ़ाए के बात कहिन।
श्री भगत ह कहिन कि पर्यटन स्थल मन म घूमे अवइया मन ल आकर्षित करे बर शासकीय प्रयास के संगेच पर्यटन क्षेत्र ले जुड़े निजी क्षेत्र के उद्यमि मन ले घलोक प्रयास करे जाना चाही, एखर से स्थानीय युवा मन ल रोजगार घलोक मिलही अऊ छत्तीसगढ़ देश के पर्यटन नक्शा म उभरही। संस्कृति मंत्री श्री भगत विश्व पर्यावरण दिवस 2019 के अवसर म काल एक निजी होटल म ट्रिप्स एण्ड ट्राइपर्स कोति ले आयोजित कार्यक्रम ल सम्बोधित करत रहिन। ए मौका म छत्तीसगढ़ी कलाकार मन कोति ले आकर्षक नृत्य के प्रस्तुति दे गीस। श्री भगत ह कार्यक्रम म ट्रिप्स एण्ड ट्राइपर्स कोति ले पर्यटन अउर संस्कृति विसय म प्रकाशित पत्रिका के विमोचन करिन। ए अवसर म सांसद श्रीमती छाया वर्मा, कलाकार अउ संस्था के पदाधिकारी अऊ पर्यटन ले जुड़े मनखे उपस्थित रहिन।
