रायपुर, प्रदेश के मुख्य सचिव श्री आर.पी. मंडल ह आज गंगरेल पहुंचके धमतरी जिला म पर्यटन विकास के संभावना अऊ अब तक होए काम मन के गहन समीक्षा करिन। बैठक के बाद उमन बोटिंग के संग गंगेरल जल क्षेत्र, गांधी मंदिर के भ्रमण करके उहां पर्यटन के संभावना उपर पर्यटन सचिव श्री पी. अन्बलगन, कलेक्टर श्री रजत बंसल आदि ले चर्चा करिन। समीक्षा के बेरा म मुख्य सचिव ह नरहरा धाम म सैलानी मन के बाढ़त संख्या ल देखके ओखर समुचित विकास करे ल कहिन।
गंगरेल के बरदिहा लेक व्यू म आयोजित समीक्षा बैठक म कलेक्टर श्री रजत बंसल ह जिला के गंगरेल, रूद्री, सोढूंर, नरहरा अऊ माड़मसिल्ली बांध आदि म पर्यटन ल विकसित करे के प्रयास के बारे म पावर पॉइन्ट प्रेजेंटेशन के संग जानकारी दीन। अइसनहे सप्तऋषि आश्रम नगरी के वनांचल ग्राम जबर्रा, सोढूंर बांध के तीर-तखार के पर्यटन स्थल के विकास के संबंध म विस्तार ले जानकारी दीन। ये बेरा म पुलिस अधीक्षक श्री बी.पी. राजभानू, वनमंडलाधिकारी श्री अमिताभ बाजपेयी, जिला पंचायत सीईओ श्रीमती नम्रता गांधी आदि अधिकारीगण उपस्थित रहिन।
