टाटामारी म टूरिस्ट इंफोर्मेशन सेंटर चालू

रायपुर, कोण्डागांव जिला म पर्यटन सुविधा के जानकारी देहे बर टाटामारी म काली मुख्यमंत्री श्री भूपेश बघेल के उपस्थिति म स्व सहायता समूह के बहिनी मन ह टूरिस्ट इंफोर्मेशन सेंटर के लोकार्पण करिन। वन अउ जलवायु बदलाव विभाग कोति ले ये सेंटर के निर्माण करीबन 25.36 लाख रूपिया के लागत ले करे गए हे। ये टूरिस्ट इंफोर्मेशन सेंटर म प्रशिक्षण सह उत्पादन केंद्र घलोक बनाय गए हे। ये मौका म मुख्यमंत्री ह मावा कोंडानार पर्यटन सर्किट उपर केन्द्रित पुस्तिका अऊ लोगो के विमोचन करिन। ये बेरा म उद्योग मंत्री अउ जिला के प्रभारी मंत्री कवासी लखमा, राज्यसभा सांसद फूलोदेवी नेताम अउ बस्तर विकास प्राधिकरण के उपाध्यक्ष संतराम नेताम घलोक उपस्थित रहिन।
मुख्यमंत्री ह टाटामारी म बनाय गए टूरिस्ट इंर्फोमेशन सेंटर के निरीक्षण करिन। जिला प्रशासन कोति ले कोण्डागांव जिला म पर्यटन संभावना मन के जानकारी देहे गीस। टाटामारी के बिहान कैंटीन म कार्यरत महिला समूह के अध्यक्ष लक्ष्मी साहू अउ सदस्य जयंती धु्रवा के हांथ मुख्यमंत्री ह टाटामारी के टूरिज्म इनफॉरमेशन सेंटर के फीता काटके शुभारंभ कराइस। हम आप ल बता देवन के कोंडागांव जिला म अपार पर्यटन के संभावना मन के दोहन अऊ स्थानीय मनखे मन ल रोजगार देवाए के उद्देश्य ले मावा कोंडानार पर्यटन सर्किट के विकास करे जात हे। एखर खातिर 03 दिन अउ 02 रात के पर्यटन पैकेज तियार करे गए हे। जेमां पर्यटक स्थानीय प्रकृति के सानिध्य म मनोरम वादी, 20 ले जादा जलप्रपात, पुरातात्विक अवशेष, आदिवासी सभ्यता-संस्कृति, प्रागैतिहासिक शैल फोटू, कोण्डागांव के अनोखी संस्कृति ले परिचित हो सकहीं।