छत्तीसगढ़ के कुरदर, सरोधा दादर अऊ धनकुल रिसॉर्ट म जनजातीय संस्कृति ले परिचित होहीं पर्यटक

रायपुर, 17 अगस्त 2020। छत्तीसगढ़ पर्यटन मण्डल कोति ले भारत सरकार के स्वदेश दर्शन योजना- ’’ट्राइबल टूरिज्म सर्किट’’ के तहत कुरदर, सरोधा दादर अऊ धनकुल म रिसॉर्ट बनाय गए हे। 28.91 करोड़ रूपिया ले बने ये तीनों रिसॉर्ट के लोकार्पण मुख्यमंत्री श्री भूपेश बघेल ह 14 अगस्त के अपन रायपुर निवास कार्यालय ले वीडियो कॉन्फ्रेंसिंग के संग करे रहिन हें। इहां पर्यटक मन ल जनजातीय संस्कृति ले रूबरू होए के मौका मिलही।

कुरदर हिल ईको रिसॉर्ट (Kurder Hill Eco Resort) के निर्माण 4 करोड़ 69 लाख 45 हजार रूपिया ले करे गए हे। ये बैगा विलेज कुरदर बिलासपुर ले 52 किलोमीटर अऊ बेलगहना ले 12 किलोमीटर के दूरी म अचानकमार टाईगर रिजर्व ले लगे पहाड़ी म स्थित हे। ईको डेस्टीनेशन के रूप म कुरदर ल विकसित करे गए हे। घना जंगल के बीच छत्तीसगढ़ के नैसर्गिक सुंदरता अऊ प्रकृति हरियाली के चादर ओढ़े कुरदर हिल ईको रिसॉट पर्यटक मन ल आकर्षित करथे।

बैगा एथनिक रिसॉर्ट सरोधादादर (Baiga Ethnic Resort Sarodhadadar) के निर्माण 13 करोड़ 28 लाख 89 हजार रूपिया ले करे गए हे। धरती अऊ आकाश ल मिलत देखे के रोमांचक अऊ अद्भूत दृश्य सरोधा दादर म देखे जा सकत हे। ये चिल्फी घाटी म स्थित हे। एथनिक रिसॉर्ट के व्यू प्वाइंट ले सुरूज के उगती अउ बुड़ती के बेरा म कुदरत के खुबसूरती ल बहुतेच नजदीक ले देखे जा सकत हे। पहाड़ी म स्थित एथनिक रिसॉर्ट म ट्राइबल थीम म हट्स, कैफेटेरिया अऊ इंटरप्रिटेशन सेंटर के निर्माण करे गए हे। इहां ले पर्यटक घना जंगल के बीच छत्तीसगढ़ के नैसर्गिक सुंदरता के मजा ले सकत हें। ये एथनिक रिसॉर्ट म छत्तीसगढ़ म पहली पइत विदेश के तर्ज म पर्यटक मन के घर बर वूडन कॉटेज के निर्माण करे गए हे। ये रिसॉर्ट म एक भव्य मुक्ताकाश मंच के घलोक निर्माण करे गए हे।

धनकुल एथनिक रिसॉर्ट (Dhankul Ethnic Resort) के निर्माण 10 करोड़ 92 लाख 72 हजार रूपिया ले करे गए हे। कोण्डागांव के खुबसूरत वादी मन म पर्यटक मन बर ये रिसॉर्ट के निर्माण करे गए हे। धनकुल एथनिक रिसॉर्ट जनजाति सामुदाय के परंपरागत विशेषता मन ल बड़का रूप ले संजोए कोनो ट्राइबल विलेज ले कम नइ हे। इहां आगमन के संगेच जगदलपुर पैलेस के प्रतिकृति म निर्मित भव्य प्रवेश द्वार अपन वैभवशाली अतीत के कहानी खुदे बताथे। ये रिसॉर्ट म जनजातीय परंपरागत शैली म संग्रहालय के निर्माण करे गए हे। जिहां जनजातीय सामुदाय के कई कालखण्ड़ म दैनिक जीवन म उपयोग के दुर्लभ वाद्ययंत्र, कृषि उपकरण, लौह शिल्प, काष्ठ शिल्प, ढोकरा शिल्प, टेराकोटा अउर बांस शिल्प ले निर्मित कई ठन कलाकृति मन ल धरोहर के रूप म प्रदर्शित करे गए हे।