परंपरागत छत्तीसगढ़ी लोक कला, संगीत अऊ लोक संस्कृति मंच म होइस साकार
श्रोता मन ह 18 घंटा तक कार्यक्रम के लीन आनंद
राजनांदगांव, जिला मुख्यालय ले करीबन 15 किलोमीटर दूरिहा सोमनी तीर के गांव साकरा म सरलग 18 घंटा तक रंगारंग मितान लोक कला महोत्सव 2022 के यादगार आयोजन करे गीस।
कार्यक्रम के मुख्य अतिथि महापौर श्रीमती हेमा देशमुख रहिस। अध्यक्षता जिला पंचायत सदस्य अंगेश्वर देशमुख ह करिस। विशेष अतिथि के रुप म छत्तीसगढ़ पर्यटन मंडल के सदस्य निखिल द्विवेदी, जनपद पंचायत राजनांदगांव के उपाध्यक्ष रोहित चंद्राकर, जनपद पंचायत के सभापति टेकूराम साहू, योगेंद्र वैष्णव, सांकरा के सरपंच दुर्गाबाई जोशी, मितान के अध्यक्ष राजेश मारू, सतनामी समाज के अध्यक्ष देवीलाल सिरमौर उपस्थित रहिन। कार्यक्रम के शुभारंभ अतिथि मन ह मां सरस्वती के पूजा अर्चना के संग करिन। एकर पाछू आयोजन समिति के सदस्य मन ह अतिथि मन के पुष्पहार ले स्वागत करिन। महोत्सव म वरिष्ठ लोक गायक कुलेश्वर ताम्रकार, लोकप्रिय गायिका रजनी रजक, छत्तीसगढ़ी फिल्म आई लव यू फेम गायक अनुराग शर्मा अऊ कंचन जोशी, उभरत लोक गायिका स्वर्णा दिवाकर, चंदन बांधे अऊ सुश्री भानु निर्मलकर ह कई प्रकार के भावपूर्ण छत्तीसगढ़ी गीत प्रस्तुत करके श्रोता मन ल ना केवल झूमे म मजबूर कर दीन भलुक उंखर ताली बटोरे म घलोक सफल रहिन। ये बेरा म विख्यात हास्य कलाकार पप्पू चंद्राकर अऊ घेवर यादव अऊ हेमलाल कौशल, नवीन देशमुख अऊ नरेश यादव के टीम ह अलग अलग प्रस्तुति मन म श्रोता मन ल ठहाका लगाय म मजबूर कर दीस। आधा रात म छत्तीसगढ़ के सुप्रसिद्ध लोक सांस्कृतिक मंच लोक प्रयाग राजिम ह अपन प्रभावी प्रस्तुति दीस। परम्परागत छत्तीसगढ़ी लोकगीत, संगीत म उमन प्रयोगात्मक प्रस्तुति दीन। छत्तीसगढ़ी गीत मन के शानदार कोरियोग्राफी ल दर्शक मन ह अड़बड़ सहराईन। एकर पाछू सोनहा बादर चितौद (धमतरी) के टीम ह रंगारंग लोक सांस्कृतिक कार्यक्रम प्रस्तुत करके मनखे मन के वाहवाही लूटे म सफल रहिस। भोर के पहिली किरण के संग छत्तीसगढ़ महतारी लोक कला संस्था धीरी भाठा के टीम ह गुरु घासीदास जी के आरती पंथी गीत के रूप म अऊ गौरा गीत प्रस्तुत करके कार्यक्रम म चार चांद लगाइस।
मितान महोत्सव के पहिली चरण काली मंझनिया 12:00 बजे ले शुरू होए रहिस। पहिली चरण म जय मां शारदा बालिका जस अउ रामायण मंडली सोमनी ह जस झांकी, जय सतनाम बालक पंथी नृत्य दल ककरेल ह पंथी नृत्य, जय बूढ़ादेव डंडा नृत्य दल ग्राम कोदवा ह डण्डा नृत्य, जय श्री राधा कृष्ण रावत नाच पार्टी ग्राम गातापार ह राउत नृत्य, एकता मानस परिवार ग्राम कांकेतरा के छै बहिनी मन ह जस जगराता, जय बूढ़ादेव करमा नृत्य दल कोदवा के कलाकार मन ह बस्तरिया कर्मा, नवयुवक आदिवासी रीलो मांदरी नृत्य ग्राम सीतापठार के कलाकार मन ह मांदरी नृत्य, जय महाकाली रामधुनी मंडली ग्राम हरदी बालोद के कलाकार मन ह रामधुनी, न्यू सत्यम संगम पंथी नृत्य दल अरसनारा के कलाकार मन ह पंथी नृत्य अऊ शीतला नव जागृति बालिका रामायण अउ फ़ाग परिवार ग्राम रातापायली के कलाकार मन ह रंगारंग फाग गीत के प्रस्तुति दीन।
सरलग 18 घंटा तक चले मितान लोककला महोत्सव म पधारे सबो कलाकार मन ल प्रशस्ति पत्र, सम्मान निधि अऊ दल प्रमुख ल स्मृति चिन्ह भेंट करके सम्मानित करे गीस। ये बेरा म कार्यक्रम के अतिथि मन ल घलोक आयोजन समिति कोति ले चिन्हारी भेंट करे गीस। कार्यक्रम ल सफल बनाए म मितान के अध्यक्ष राजेश मारू, छत्तीसगढ़ पर्यटन मंडल के सदस्य निखिल द्विवेदी, जिला पंचायत सदस्य अंगेश्वर देशमुख ,लोक कलाकार बरसन देशलहरे, सतनामी समाज के अध्यक्ष देवीलाल सिरमौर, हेमेंद्र सिरमौर, मितान छत्तीसगढ़ी लोक कलाकार कल्याण संघ के उपाध्यक्ष महादेव हिरवानी, कोषाध्यक्ष महेश्वर साहू, सचिव विष्णु कश्यप, वरिष्ठ गीतकार हर्ष कुमार बिंदु, नरेंद्र साहू ,धन्नू लाल साहू, राजू मंडले,विनोद गौतम ह महत्वपूर्ण योगदान इहन। कार्यक्रम के प्रभावशाली संचालन संस्कृतिकर्मी वीरेन्द्र बहादुर सिंह अऊ भिलाई के वरिष्ठ लोक गायिका श्रीमती रजनी रजक ह करिस।