खिलाड़ी मन ले मिलके मुख्यमंत्री ह करिन उंखर हौंसला अफजाई
दीप प्रज्ज्वलित करके छत्तीसगढ़िया ओलंपिक के मुख्यमंत्री ह करिन शुभारंभ
लेख- मनोज सिंह, सहायक संचालक
रायपुर, छत्तीसगढ़ के संस्कृति अऊ सभ्यता के चर्चा पुरातन काल ले होत आत हे। बीते कुछ समय तक ये संस्कृति ल करीबन भुला देहे गए रहिस। फेर छत्तीसगढ़ के मुख्यमंत्री के रूप म शपथ लेहे के बाद ले ही श्री भूपेश बघेल ह इहां के संस्कृति अऊ पुरातन सभ्यता ल विश्व पटल म लाय के योजना उपर काम शुरू करे हें। स्थानीय तिहार मन के बेरा म छुट्टी, बोरे-बासी ल वैश्विक पहिचान देवाना, स्थानीय तिहार मन के प्रति मनखे मन ल जागरुक करना मुख्यमंत्री श्री भूपेश बघेल के पहल के परिणाम ये। इही कड़ी छत्तीसगढ़ के संस्कृति ले मनखे मन ल जोड़े खातिर छत्तीसगढ़िया ओलंपिक के शुरूआत करे गए हे जेकर संकल्पना खुद मुख्यमंत्री श्री बघेल ह करे हें।
मुख्यमंत्री के सादगी, संजीदगी अऊ स्थानीय संस्कृति के प्रति लगाव के अनुमान इही बात ले लगाए जा सकत हे कि छत्तीसगढ़िया ओलंपिक के शुभारंभ के अवसर म मुख्यमंत्री खुद रेफरी के सीटी लेके महिला कबड्डी खिलाड़ी मन के बीच पहुंच गें अऊ मैच म निर्णायक के भूमिका निभाए लगिन। अतकेच नहीं मुख्यमंत्री ह लंगड़ी, भौंरा, बाटी (कंचा) अऊ पिट्ठुल जइसे खेल मन मे खिलाड़ी के रूप म खुद घलोक हाथ आजमाइन अऊ आन खिलाड़ी मन के संग खुद ल एक खिलाड़ी के रूप म प्रस्तुत करिन अऊ खिलाड़ी मन के उत्साह वर्धन करिन।
जानबा हे कि छ्त्तीसगढ़ के संस्कृति ले मनखे मन ल जोड़ के रखे बर स्थानीय खेलकूद ल बढ़ावा देहे बर मुख्यमंत्री के पहल म छत्तीसगढ़िया ओलंपिक के शुरूआत आज 6 अकटूबर ले करे गए हे। 6 जनवरी 2023 तक चलइया ये ओलंपिक म दलीय अउ एकल श्रेणी म 14 प्रकार के पारंपरिक खेलकूद मन ल सामिल करे गए हे जेमां 18 साल ले कम, 18 ले 40 साल अउ 40 साल ले जादा आयु वर्ग के मनखे सामिल होवत हें। एखर से स्थानीय मनखे मन ल एक कोति खेल के मंच मिलही उहें उमन म खेल के प्रति जागरूकता बाढ़ही अऊ खेल भावना के घलोक विकास होही।
