रेलवे इंफ्रास्ट्रक्चर म तेजी ले होवत निवेश अवइया पीढ़ी मन बर नवा भविष्य गढ़ही : मुख्यमंत्री श्री साय
छत्तीसगढ़ के प्रयाग राजिम जुडि़स रेल नेटवर्क ले
रायपुर अऊ राजिम के आए-जाए बर यात्री सुविधा म होइस सुविधा
रायपुर, मुख्यमंत्री श्री विष्णु देव साय ह आज राजिम म नवा रेल सेवा के शुभारंभ करिन। उमन क्षेत्र के मनखे मन के आवागमन सुविधा म बढ़ोतरी करत राजिम ले रायपुर बर नवा मेमू ट्रेन सेवा ल हरी झंडी देखाके रवाना करिन। ए बेरा म उमन राजिम-रायपुर-राजिम मेमू नवा ट्रेन सेवा अऊ रायपुर-अभनपुर 2 मेमू रेल सेवा के राजिम तक विस्तार घलोक चालू करिन। भारी संख्या म यात्री ए बेरा म ट्रेन म सवार होइन अऊ उत्साहपूर्वक रायपुर कोति रवाना होइन। सस्ता अऊ सुलभ नवा रेल सुविधा मिले ले पूरा क्षेत्र म हर्ष अऊ उल्लास के वातावरण रहिस।
मुख्यमंत्री श्री साय ह कहिन के ए नवा रेल सेवा ले राजिम संग गरियाबंद अऊ देवभोग क्षेत्र के मनखे मन ल घलोक राजधानी रायपुर तक सस्ता अऊ किफायती यात्रा के विकल्प प्राप्त होही। विद्यार्थी, नौकरीपेशा वर्ग अऊ व्यापारी वर्ग संग सबो के बर ये ट्रेन बहुत उपयोगी सिद्ध होही। उमन कहिन के छत्तीसगढ़ के प्रयाग, राजिम अब रेल नेटवर्क ले जुड़ गए हे। ग्रामीण अंचल ले राजधानी रायपुर के आवागमन अब अऊ जादा सुगम, सुविधाजनक अऊ किफायती बन गए हे।