बिलासपुर, 18 सितंबर 2020। पोषण अभियान अंतर्गत कृषक महिला मन बर प्रशिक्षण कार्यक्रम आयोजित करे गीस। ये कार्यक्रम म उपस्थित महिला मन ल पोषण स्तर म सुधार बर पोषण वाटिका, बायो फर्टिफाईड किस्म अउ पोषण थाली के विसय उपर परखर जानकारी प्रदान करके सब्जी बीज किट बांटे गीस।
पोषण-संवेदी कृषि संसाधन अऊ नवोन्मेषण (नारी) कार्यक्रम के तहत आयोजित ये प्रशिक्षण म उपस्थित वरिष्ठ वैज्ञानिक अऊ प्रमुख, डॉ. एस.पी. सिंह ह स्वच्छता ल स्वास्थ्य के आधार बतात जल म घुलनशील विटामिन अऊ वसा म घुलनशील विटामिन के स्त्रोत के जानकारी दीन। केन्द्र के सस्य वैज्ञानिक श्रीमती शिल्पा कौशिक ह पोषण के महत्व बताइस। डॉ. निवेदिता पाठक ह कृषक महिला मन ल साल भर पोषक सब्जी उत्पादन बर लेआउट, पोषण वाटिका के मुख्य तत्व, वाटिका के तैयारी, बीजोपचार के जानकारी के संग बायो फर्टिफाईड धान, गेंहू, सब्जी अउ फल के किस्म मन के जानकारी प्रदान करिन। उमन बताइन के ये किस्म मन कुपोषण दूर करे म सहायक होहीं। डॉ. श्रीमती अंजुली मिश्रा ह पोषण के महत्व बतात आहार के छै समूह मन के विस्तार ले जानकारी प्रदान करिन। डायरिया अउ एनीमिया जइसे रोग मन ले बचे के उपाय अऊ आहार आयोजन के जानकारी घलोक प्रदान करे गीस। ये कार्यक्रम म कृषि विज्ञान केन्द्र, बिलासपुर के श्री जयंत साहू, श्रीमती सुशीला ओहदार घलोक उपस्थित रहिन।
