बेलासपुर, 26 मई 2024। मालवाहक ले सवारी ढोवइया वाहन चालक मन के खिलाफ परिवहन विभाग अभियान चलावत हे। एखर बर तगड़ा जांच चलत हे तभो ले चालक मन लापरवाही करत हें। इही कारण से तीसरइया दिन फेर विभाग के उड़नदस्ता ह चार वाहन ल जब्त करे हे। ए सबो म सामान के जगा मनखे ल ठूंस-ठूंस के भरे गए रहिस। सरकार के निर्देश म परिवहन विभाग सख्त होय हे अऊ मालवाहक ले सवारी ढोवइया वाहन के धरपकड़ होवत हे। विभाग के उड़नदस्ता दल रतनपुर मार्ग म रानीगांव के करीब जांच करत रहिस त ओ मन ल ल एक माजदा नजर आइस, जेमां लगभग 25 ले 30 के संख्या म मनखे भरे रहिस। ए माजदा ल जब्त करे गीस। उहें एक आन टीम रायपुर मार्ग म सरगांव के करीब जांच करत रहिस। जेमा तीन पिकअप पकड़ म आइस, जेमा मजदूर मन बईठे रहिन। ये मोटर व्हीकल एक्ट के खुला उल्लंघन ये ते पाए के ए गाड़ी मन के चालक मन के खिलाफ कारवाही करके वाहन जब्ती के कार्रवाई करे गीस।
पुलिस ह 4 माल वाहक ल करिस जब्त, सरकार के हुकुम म परिवहन विभाग कड़क
