रायपुर, 29 जून 2024/ मुख्यमंत्री श्री विष्णु देव साय के विशेष पहल म आम नागरिक मन ल एक अऊ नवा सुविधा परिवहन विभाग कोति ले देहे जात हे। आवेदक के पता म नइ पहुंचइया ड्राइविंग लाइसेंस अऊ पंजीयन प्रमाण पत्र अब संबंधित आवेदक मन ल ऊंखर जिला के क्षेत्रीय, अकतहा क्षेत्रीय अऊ जिला परिवहन कार्यालय के माध्यम ले बांटे जाही। आम नागरिक मन के सुविधा के दृष्टि ले ये व्यवस्था एक जुलाई ले लागू करे जात हे।
मुख्यमंत्री श्री साय के आगू ये बात आईस के परिवहन विभाग कोति ले डाक के माध्यम ले भेजे गे कई ड्राइविंग लाइसेंस अउ पंजीयन प्रमाण पत्र पता सही नइ होए के सेी नवा रायपुर स्थित परिवहन विभाग के मुख्यालय इन्द्रावती भवन म वापस लहुट आत रहिस। अइसन आवेदक मन ल अपन ड्राइविंग लाइसेंस अऊ पंजीयन प्रमाण पत्र पाए बर नवा रायपुर आना परत रहिस। मुख्यमंत्री ह आवेदक मन के दिक्कत ल महसूस करत परिवहन विभाग के अधिकारी मन ल ये निर्देश दीस के लहुट गए ड्राइविंग लाईसेंस अउ पंजीयन प्रमाण पत्र संबंधित जिला के क्षेत्रीय, अकतहा क्षेत्रीय, जिला परिवहन कार्यालय के माध्यम ले वितरित करे जाय।
परिवहन विभाग के अधिकारी मन ह बताइन के अस्पष्ट या अपूर्ण पता के सेती नवा रायपुर स्थित परिवहन मुख्यालय लहुटईया ड्राइविंग लाइसेंस अऊ पंजीयन प्रमाण पत्र लेहे बर नवा रायपुर आए के जरूरत नइ परय। आवेदक संबंधित कार्यालय ले वैध कागद प्रस्तुत करके अपन चालक लाईसेंस या पंजीयन प्रमाण पत्र प्राप्त कर सकहीं। ए संबंध म परिवहन विभाग से सबो अधीनस्थ कार्यालय ल दिशा-निर्देश जारी कर देहे गे हे।