बलरामपुर, 14 जून 2020। मतिया अपन घर के अंगना म बांस ल छोट-छोट कूटा करके अपन पति ल देवत हे, जऊन बांस ह निसेनी कस कुछु बनत हे तइसे दिखत हे। पूछे म मतिया ह बताइस के बांस ले ट्री-गार्ड बनावत हे, जेखर उपयोग पौधा मन के बचाव बर करे जाथे। नारी शक्ति समूह के सदस्य मतिया अउ निर्मला ह कहिन के लॉकडाउन के बेरा म जब हमार पास आजीविका के कोनो साधन नइ रहिस, तब प्रशासन ह ट्री-गार्ड निर्माण के माध्यम ले हमला रोजगार उपलब्ध करवाए हे। महिला समूह के सदस्य अपन परिवार के संग ट्री-गार्ड के निर्माण काम म संलग्न हें।
विकासखण्ड राजपुर के ग्राम बदौली म एनआरएलएम के स्व सहायता समूह मन के महिला मन ट्री-गार्ड निर्माण के काम ले जुड़े हें। लॉकडाउन के अवधि म जिहां एक तरफ रोजगार अऊ आजीविका के समस्या उत्पन्न होवत रहिस, उहें एनआरएलएम के महिला समूह मन बर ट्री-गार्ड निर्माण के काम रोजगार के संग-संग जीवन-यापन बर आय के प्रमुख स्त्रोत बन गए हे। जिला पंचायत के मुख्य कार्यपालन अधिकारी श्री हरीष एस. के बताती वन विभाग ह वर्षा ऋतु म वृहद पैमाना म वृक्षारोपण के काम करथे अऊ पौधा के सुरक्षा बर ओ मन ल ट्री-गार्ड के जरूरत होथे। जिला प्रशासन अऊ वन विभाग ह समन्वयन स्थापित करके ट्री-गार्ड के आपूर्ति बर महिला समूह मन ल एखर से जोड़े के फैसला लेहे हे। अभी हाल म विकासखण्ड राजपुर के 10 महिला स्व सहायता समूह ट्री-गार्ड निर्माण के काम करत हें। महिला मन अब तक 3 हजार ट्री-गार्ड बना डरे हें, जेमा ले 900 ट्री-गार्ड के आपूर्ति वन विभाग ल करे गए हे अऊ बांचे ट्री-गार्ड के आपूर्ति घलोक जल्दी करे जाही। उमन बताइस के महिला मन ल अवसर के जरूरत होथे, उमन म क्षमता के कमी नइ हे। प्रशासन ह महिला मन के उत्थान बर हर संभव प्रयास करे हे अऊ आगू घलोक प्रतिबद्धता के संग समानता के हर अवसर उपलब्ध करवाही। महिला मन के ट्री-गार्ड निर्माण के काम म रूचि अपन आप स्फूर्त हे, हमन केवल ओ मन ल दिशा देहे हन।
महाजन मुक्ति समूह के कमलो कौशिक ह बताइस के वन विभाग के जरूरत ल देखत हमने 10 हजार ट्री-गार्ड बनाए के लक्ष्य रखे हवन। एक ट्री-गार्ड के विक्रय मूल्य 435 रूपिया निरधारित करे गए हे। लागत अऊ परिश्रम ल देखत ट्री-गार्ड के उचित मूल्य हमला मिलही। कोविड-19 के सेती उपजे विषम परिस्थिति मन के समय कलेक्टर, जिला पंचायत सीईओ, वन विभाग के अधिकरी, एनआरएलएम के टीम ह हमला ये अवसर प्रदान करत रोजगार देहे हे। समूह के महिला मन ह प्रशासन के ये पहल बर ओ मन ल हृदय ले धन्यवाद देहे हें।
