वन विभाग ह ए साल 99 लाख ले जादा पौधा के करही रोपण अऊ बांटही 2.27 करोड़ पौधा- श्री अकबर

रायपुर, 03 जून 2021। वन अऊ जलवायु बदलाव विभाग कोति ले राज्य म चालू वित्तीय साल 2021-22 के समय कई योजना के अंतर्गत 99 लाख 35 हजार 193 पौधा के रोपण करे जाही। एकर रोपण 187 किलोमीटर/13 हजार 905 हेक्टेयर रकबा म होही। एखरे संग वन विभाग ह ए साल 2 करोड़ 27 लाख पौधा जनता मन ल बांटही तको। राज्य म वृक्षारोपण कार्यक्रम के सफल क्रियान्वयन बर वन विभाग के जम्‍मो 275 नर्सरी मन म 284 प्रजाति के करीबन 3 करोड़ 89 लाख पौधा अभी हाल म उपलब्‍ध हे।
वन अऊ जलवायु बदलाव मंत्री श्री मोहम्मद अकबर ह आज राजधानी के शंकर नगर स्थित अपन निवास कार्यालय ले वर्चुअल बैठक म वृक्षारोपण कार्यक्रम के संबंध म विस्तार ले समीक्षा करिन। बैठक म प्रमुख सचिव वन श्री मनोज पिंगुआ, प्रधान मुख्य वन संरक्षक अऊ वन बल प्रमुख श्री राकेश चतुर्वेदी, अपर प्रधान मुख्य वन संरक्षक श्री तपेश झा अऊ कैम्पा के मुख्य कार्यपालन अधिकारी श्री व्ही.श्रीनिवास राव मौजूद रहिन। एखर अलावा जम्‍मो मुख्य वन संरक्षक अऊ वनमंडलाधिकारी घलोक वर्चुअल बैठक म जुड़े रहिन।