बेमेतरा, 21 मई 2020। लॉकडाउन के बीच अपन घर जावत मजदूर सड़क हादसा के शिकार होगे हे. बेमेतरा जिला के नांदघाट थाना इलाका के नेशनल हाईवे म मजदूर मन ले भरे बस अउ ट्रक के जबरदस्त टक्कर होय हे. ये टक्कर म 4 मजदूर मन के मउत होगे हे, जबकि ये हादसा म कई मजदूर घायल होगे हे. घायल मन ल इलाज बर नजदीक के अस्पताल म भर्ती करवाये गए हे.
जानकारी के अनुसार ये घटना बिहनिया करीब 9 बजे रायपुर-बिलासपुर मार्ग के टेमरी गांव के तिर होय हे. बस क्रमांक सीजी 08 एम 0565 म सवार सबो मजदूर छत्तीसगढ़ के रहने वाला हे. पुणे ले बस के माध्यम ले अपन घर लौटत रहिस. उही बेरा ये दर्दनाक हादसा होगे.
नांदघाट थाना प्रभारी वीके कोमरा ह बताइस कि मजदूर पुणे ले छत्तीसगढ़ पहुंचे रहिस. ये बस म राजनांदगांव, बिलासपुर, रायपुर सहित कई जिला के मजदूर सवार रहिस. हादसा म 4 मजदूर मन के जान चले गए हे. कई मजदूर घायल घलो होय हे, घायल मन ल अस्पताल म भर्ती करवाये गए हे. फिलहाल पूरा मामला के जांच करे जावत हे.
