मुख्यमंत्री श्री विष्णुदेव साय के विज़न ल मिलीस नवा आयाम
जशपुर, छत्तीसगढ़ के इतिहास म आज एक नवा अध्याय जुड़ गे। जशपुर जिला के पाँच जनजातीय युवा पर्वतारोही हिमाचल प्रदेश स्थित दुहंगन ग्लेशियर क्षेत्र बर रवाना हो गे हे। ये 18 दिन ले जादा हिमालयी प्रशिक्षण अऊ पर्वतारोहण अभियान केवल साहस अऊ रोमांच के अनुभव ही न ही, बल्कि मुख्यमंत्री श्री विष्णुदेव साय के ओ विज़न के हिस्सा हे, जेखर तहत उमन जनजातीय युवा मन ल नवा ऊँचाइ तक पहुँचाए अऊ ओ मन ल वैश्विक पहिचान देवाए के संकल्प लेहे हें।
जशपुर ले निकलके हिमालय के चोटी तक
साजन टोप्पो, संजीव कुजूर, प्रतीक एक्का, मनीष नायक अऊ अजीत लकड़ा ये पाँचों युवा जशपुर के जनजातीय पृष्ठभूमि ले आथें। इनकर हिमालय कोति बढ़त साहसिक कदम ये साबित करत हे के गाँव अऊ जंगल के माटी ले निकले सपना घलोक दुनिया के सबले कठिन चोटी मन ल छू सकत हे। ये अभियान नइ केवल जशपुर, बल्कि पूरा छत्तीसगढ़ के युवा मन बर प्रेरणादायी संदेश हे के अवसर अऊ जज़्बा होही त कोनो मंज़िल दूर नइ हे।
मुख्यमंत्री के आशीर्वाद अऊ राज्य सरकार के सहयोग
मुख्यमंत्री श्री विष्णुदेव साय ह रवाना होए के पहिली पर्वतारोहण टीम ल शुभकामना अऊ आशीर्वाद दीन। उमन कहिन के छत्तीसगढ़ के जनजातीय युवा मन के ऊर्जा अऊ क्षमता ल वैश्विक मंच तक पहुँचाना उंखर प्राथमिकता हे। राज्य सरकार के सहयोग अऊ प्रतिष्ठित राष्ट्रीय-अंतरराष्ट्रीय संस्थान मन के मार्गदर्शन ले ये अभियान संभव हो पाए हे।
अंतरराष्ट्रीय पर्वतारोही मन के संग
ए यात्रा म स्पेन, अमेरिका अऊ भारत के विख्यात पर्वतारोही अऊ गाइड टीम के संग रइही। युवा पर्वतारोही बर्फीली चोटी, ग्लेशियर अऊ दुर्गम चट्टान मन म चढ़ाई करत नवा पर्वतारोहण मार्ग मन ल तलाशहीं। ये अनुभव आगू चलके छत्तीसगढ़ के युवा मन ल प्रोफेशनल एडवेंचर स्पोर्ट्स अऊ साहसिक पर्यटन के दिशा म सशक्त करही।
ये टीम हिमालय के ऊँचाइ मन तक पर्यावरण संरक्षण अऊ स्वच्छ भारत मिशन के संदेश लेके जाही। अभियान के शुरुआत ले पहिली पर्वतारोही मन ह जशपुर के प्रसिद्ध मधेश्वर धाम म पूजा-अर्चना करके आशीर्वाद लीन।
ये केवल हिमालय के चढ़ाई भर न ही, बल्कि जनजातीय युवा मन के शक्ति, मुख्यमंत्री के विज़न, पर्यावरणीय जागरूकता अऊ रोमांच के संगम हे। अवइया पीढ़ी बर ये एक प्रेरणा बनही के कहूं हौसला बुलंद होही त नइ केवल हिमालय, बल्कि सपना के हर ऊँचाई ल छुए जा सकत हे।
हिमालय कोति रवाना होइस जशपुर के जनजातीय पर्वतारोहण टीम
