राज्योत्सव म आदिम जाति कल्याण विभाग के स्टॉल म उमड़त हे मनखे मन के हुजूम

रायपुर, छत्तीसगढ़ राज्योत्सव म नवा रायपुर के डॉ. श्यामा प्रसाद मुखर्जी मेला ग्राउंड म आदिम जाति कल्याण विभाग कोति ले लगाए स्टॉल म मनखे मन के हुजूम उमड़त हे। कई ठन योजना मन उपर बनाय गे थीम मनखे मन खातिर आकर्षण के केन्द्र बने हे। जानबा हे के छत्तीसगढ़ राज्य स्थापना दिवस के 25 साल पूरा होए म राज्योत्सव 2025 ल रजत जयंती के रूप म मनाए जात हे। ए पइत राज्योत्सव के आयोजन 01 नवम्बर ले 05 नवम्बर तक पांच दिन के करे जात हे। प्रधानमंत्री श्री नरेन्द्र मोदी ह 01 नवंबर के रजत जयंती राज्योत्सव के शुभारंभ करे रहिन।
राज्योत्सव म लगाए विभागीय स्टॉल म आदिम जाति विकास, अनुसूचित जाति विकास, आन पिछड़ा वर्ग अऊ अल्पसंख्यक विकास विभाग के हितार्थ चलाए जात विभागीय योजना मन म विशेष रूप ले फोकस करे गए हे। एखर सेती स्टॉल मनखे मन ल विशेष रूप ले लोभावत हे। ये मां शहीद वीर नारायण सिंह स्मारक सह जनजातीय स्वतंत्रता संग्राम सेनानी संग्रहालय के झलक, पीएम जनमन, धरती आबा जनजातीय ग्राम उत्कर्ष अभियान, आदि कर्मयोगी अभियान, छत्तीसगढ़ के जनजातीय जीवनशैली के प्रदर्शन, एकलव्य आदर्श आवासीय विद्यालय अंतर्गत उपलब्धि, राज्य गठन ले लेके अब तक विभाग के 25 बछर के उपलब्धि मन उपर फोकस करे गए हे। एखर संगेच आदिम जाति अनुसंधान अऊ प्रशिक्षण संस्थान कोति ले प्रकाशित कई ठन पुस्तक मन ल अवलोकन अऊ विक्रय बर स्टॉल म रखे हे, जेन मनखे मन ल लोभावत हे। मेला म बड़ संख्या म पुस्तक के विक्रय घलोक होय हे। स्टाल म गिरौदपुरी धाम ले संबंधित जैतखम अऊ स्थल के विशेषता घलोक बताए गए हे। एखर अलावा छत्तीसगढ लौह शिल्पकार विकास बोर्ड के प्रदर्शनी अऊ सेल्फी जोन घलोक विशेष आकर्षण के केन्द्र बने हे।