नई दिल्ली GG Digital News Desk, छत्तीसगढ़ के बस्तर अउ उहाँ के कला के डंका अब दिल्ली म बजइया हे। 9 दिसंबर 2025, मंगलवार के दिन हमर प्रदेश बर बड़का गरब के दिन होही। दिल्ली के विज्ञान भवन म होवइया ‘हस्तशिल्प पुरस्कार 2025’ समारोह म राष्ट्रपति श्रीमती द्रौपदी मुर्मू हमर छत्तीसगढ़ के शिल्पकार सुश्री हिराबाई झरेका बघेल ल सम्मानित करही।
काबर मिलत हे सम्मान?
जगदलपुर के रहइया सुश्री हिराबाई ह ‘बेल मेटल’ यानी धातु कला म माहिर हें। उनकर हाथ म जादू हे, जेखर से वो पीतल अउ कांसा ले अइसन सुन्दर मूर्ति अउ कलाकृति बनाथें के देखइया मन देखत रहि जाथे। उंकर इही हुनर बर उनला राष्ट्रीय पुरस्कार ले नवाजे जाही।
कार्यक्रम म का-का होही?
कपड़ा मंत्रालय डहर ले आयोजित ये कार्यक्रम म साल 2023 अउ 2024 के देस भर के चुने गए कारीगर मन ल सम्मान मिलही। मुख्य अतिथि राष्ट्रपति द्रौपदी मुर्मू रइही अउ केंद्रीय कपड़ा मंत्री श्री गिरिराज सिंह कार्यक्रम के अध्यक्षता करहीं।
हस्तशिल्प सप्ताह के धूम
बता दन के अभी 8 ले 14 दिसंबर तक पूरा देश म ‘राष्ट्रीय हस्तशिल्प सप्ताह’ मनाए जावत हे। एखर उद्देश्य हमर पुराना कला ल बचाय रखना अउ गाँव-गवई के कारीगर मन ल आजीविका के साधन देना हे। सरकार ह 1965 ले ये पुरस्कार देवत हे, ताकि अच्छा काम करइया कारीगर मन के मान बढ़ सकय। हिराबाई के ये उपलब्धि ले न सिरिफ बस्तर बल्कि पूरा छत्तीसगढ़ के सीना चौड़ा हो गे हे। ये हमर लोक कला अउ संस्कृति के बहुत बड़ जीत हरय।
