रायपुर, छत्तीसगढ़ म पहली पईत आयोजित होवईया राष्ट्रीय आदिवासी नृत्य महोत्सव म संघरे बर त्रिपुरा के मुख्यमंत्री श्री बिप्लब देब ह अपन सहमति प्रदान कर दिए हें। मुख्यमंत्री श्री भूपेश बघेल के नेवता ल लेके लोक स्वास्थ्य यांत्रिकी अउ ग्रामोद्योग मंत्री गुरु रूद्रकुमार आज त्रिपुरा के राजधानी अगरतला म उहां के मुख्यमंत्री श्री बिप्लब देब ले सौजन्य मुलाकात करिन अऊ ओ मन ल राज्य म 27 ले 29 दिसंबर तक रायपुर म आयोजित होवइया राष्ट्रीय आदिवासी नृत्य महोत्सव म आए बर आमंत्रित करिन। श्री देब ह ये अनूठा अऊ भव्य आयोजन के सफलता बर अग्रिम बधाई देवत आमंत्रण स्वीकार करके आए के सहमति दिए हें।
जानबा हे कि 27 ले 29 दिसंबर तक आयोजित होवइया राष्ट्रीय आदिवासी नृत्य महोत्सव म भारत के कई राज्य अउ केंद्र शासित प्रदेश मन के जनजाति समूह मन के भागीदारी अऊ सहभागिता बर अऊ पड़ोसी देश मन के कलाकार मन ल राष्ट्रीय आदिवासी नृत्य महोत्सव म प्रस्तुति बर आमंत्रित करे गए हे। ये बेरा म मंत्री गुरु रूद्रकुमार ह मुख्यमंत्री श्री बिप्लब देब ल छत्तीसगढ़ राज्य के महत्वाकांक्षी योजना अऊ राज्य म संचालित लोक कल्याणकारी योजना मन के जानकारी घलोक दीन। उमन श्री देब ल बस्तर अऊ सरगुजा वनांचल के जनजातीय संस्कृति, पर्यटन अऊ उहां होवत विकास काम मन ले घलोक अवगत कराइन।
