ट्रक चालक ह अपन मालिक के धान ल बेचीस अउ होइस फरार,पुलिस जुटीस जांच म

धमतरी, 13 नवम्बर 2020। ट्रक चालक ह अपन मालिक के धान ल बेच दीस अउ ट्रक छोड़ के फरार होगे। पुलिस ल मिले जानकारी के अनुसार सिहावा चौक के पास एक ट्रक वाहन क्रमांक सीजी 04 एचडब्लू 8997 खड़े रिहिस। बताय जावत हे कि ये ट्रक अभनपुर निवासी वीरेंद्र पासवान के हे, जेला ओखर ड्राइवर जीवन साहू निवासी तेलीबांधा चलात रिहिस हे। ड्राइवर ट्रक लेके 10 नवम्बर के लखनपुरी जाके धान खाली करिस फेर उहा ले कुरूद बर 700 बोरा धान लेके निकलिस, जे करीब 265.14 क्विंटल रिहिस। ओखर बाद गाड़ी सिहावा चौक म खड़े मिलीस अउ लोड माल ले करीब 150 बोरा धान कम हे। शंका हे कि ट्रक चालक ह धान बेच देहे हे अउ गाड़ी छोड़ के फरार होगे। बहरहाल मामला के शिकायत म कोतवाली पुलिस ह ट्रक चालक जीवन उपर अमानत म खयानत के धारा 407 के तहत अपराध दर्ज करके ओखर तलाश म जुट गेहे।