दंतेवाड़ा, उपमुख्यमंत्री अऊ गृहमंत्री श्री विजय शर्मा अपन बस्तर प्रवास के समय इतवार के गीदम के साप्ताहिक बाजार पहुंचिन। अपन सहज अऊ मिलनसार स्वभाव खातिर प्रसिद्ध श्री शर्मा ह गांव वाले मन अऊ व्यापारी मन ले आत्मीय गोठ-बात करिन अऊ ऊंखर हालचाल पूछिन।
स्थानीय व्यापारी मन ह बताइन के शासन के नीति अऊ जीएसटी दर म कमी ले व्यापार म सुगमता आए हे अऊ जिनिस मन सस्ती हो गए हे। उमन कहिन के नक्सल डर खतम होए ले अब ओ मन निडर होके कारोबार करत हें अऊ गांव वाले मन ल जरूरी जिनिस सही दाम म मिलत हे।
गांव वाले मन ह घलोक नक्सल उन्मूलन अऊ शांति स्थापना खातिर शासन के उदीम मन ल सहराइन। उमन कहिन के अब क्षेत्र म विकास अऊ स्थायी शांति के नवा शुरुआत हो गए हे। नक्सली विचारधारा ले दूर होके कई युवा मुख्यधारा म लहुटत हें, जेखर से बस्तर के वातावरण सकारात्मक बनत हे।
श्री शर्मा ह बाजार म स्थानीय फल मन के स्वाद लीन अऊ मनखे मन ले आत्मीयता ले गोठबात करिन। उमन कहिन के बस्तर के विकास के नींव स्थायी शांति हे अऊ शासन एखर बर सरलग काम करत हे। ए अवसर म बस्तर संभाग आयुक्त श्री डोमेन सिंह अऊ आईजी श्री सुंदरराज पी घलोक उपस्थित रहिन।
गीदम के बाजार म गूंजिस विकास अउ सरकार उपर भरोसा के अवाज– उपमुख्यमंत्री विजय शर्मा बोलिन, बस्तर म लहुटिस शांति
