सेहत के महत्व अउ स्वास्थ्य विभाग के योजना म केंद्रित हे पत्रिका
रायपुर, नेहा राठौर के खबर/ स्वास्थ्य मंत्री श्री टी.एस. सिंहदेव ह अपन निवास कार्यालय म सेहत के महत्व अउ स्वास्थ्य विभाग के योजना म केंद्रित ‘अनमोल जीवन’ पत्रिका के विमोचन करिस हे। विश्व स्वास्थ्य दिवस के मौका म अनमोल न्यूज-24 द्वारा ए पत्रिका के प्रकाशन करे गए हे। स्वास्थ्य मंत्री श्री सिंहदेव ह ‘अनमोल जीवन’ आरोग्य विशेषांक के विमोचन करत हुए कहिस के जीवन म स्वास्थ्य के महत्व सबले उपर हे। लोगन मन ल अपन स्वास्थ्य के प्रति जागरूक होना ही चाहिए। ए कई प्रकार के बीमारी ले बचाव के महत्वपूर्ण तरीका आए। ओ ह कहिस हे कोनो मनखे ह बीमार होए ब नई चाहए , लेकिन अपन स्वास्थ्य के प्रति बरते गए लापरवाही ह गंभीर रूप ले बीमार कर देथे। श्री सिंहदेव ह लोगन मन से अपन स्वास्थ्य के बने देखभाल करे अउ स्वास्थ्य सेवा के जरुरत पड़े म नजदीकी स्वास्थ्य केन्द्र चाहे डॉक्टर ले संपर्क करे के अपील करिस हे।
अनमोल न्यूज-24 के सम्पादक श्री अशोक कुमार साहू ह बताइस के विश्व स्वास्थ्य दिवस के अवसर म स्वास्थ्य ल बिसेस केंद्रित करके “अनमोल जीवन” आरोग्य विशेषांक के प्रकाशन करे गए हे। एमा स्वास्थ्य जागरूकता के जम्मो जानकारी ल विस्तार ले बताए गए हे। अनमोल जीवन “आरोग्य विशेषांक” पत्रिका सब्बो प्रदेशवासी मन ब उपयोगी साबित होही। पत्रिका के विमोचन के अवसर म डॉ. सुखदेव राम साहू, अध्यक्ष समाज गौरव विकास समिति रायपुर, श्री अलख राम यादव, अध्यक्ष छत्तीसगढ़िया झेरिया यादव समाज रायपुर अउ युवा व्यवसायी व समाज सेवी श्री जितेन्द्र चन्द्राकर उपस्थित रहिस हे।
