- दशहरा मंच बर 30 लाख रुपिया के करिन घोषणा
- संगेच दशहरा मैदान म सार्वजनिक भवन बर 20 लाख रुपिया के घोषणा
- पैवर ब्लॉक लगाय अऊ बाउंड्री वॉल बर 10 लाख रुपिया के घोषणा के
- संगेच कहिन कि परिसर के समतलीकरण अउ सौंदर्यीकरण घलोक करबोन
- आज शुभ दिन ये, शुभ संकल्प लेके सरलग अपन प्रदेश के तरक्की बर काम करव: श्री बघेल
रायपुर, विजयादशमी कार्यक्रम म हिस्सा लेहे दुर्ग जिला के कुम्हारी म महामाया मंदिर स्थित दशहरा मैदान म मुख्यमंत्री श्री भूपेश बघेल ह जनता ल विजया दशमी के शुभकामना दीन। उमन कहिन कि आज के ये शुभ दिन ह असत्य ऊपर सत्य के विजय के चिन्हारी ये। राम कथा के आदर्श ल आज के दिन हम सब जीथन। रमायन के आदर्श पात्र मन ल हम अपन जीवन म उतारे के संकल्प लेथन।
इहां हर साल विजयादशमी के आयोजन होथे अऊ आप मन अतीक उत्साह ले इहां सामिल होथव। एला अऊ भव्यता मिलय, ये सुग्घर काम अऊ आगू बढ़य, एखर बर हम बाना उचाये हन। मुख्यमंत्री ह ये बेरा म इहां सार्वजनिक भवन बनाये बर 20 लाख रुपिया देहे के घोषणा करिन। दशहरा मंच बनाये बर 30 लाख रुपिया के घोषणा करिन। परिसर म अहाता बनवाए बर 10 लाख रुपिया के घोषणा करिन। उमन कहिन कि परिसर के समतलीकरण घलोक कराए जाही अऊ सौंदर्यीकरण घलोक कराए जाही।