मनेंद्रगढ़, 13 फरवरी 2024। मनेंद्रगढ़-चिरमिरी-भरतपुर जिला के भरतपुर जनपद पंचायत के ग्राम रामगढ म 62 बछर के सियानिन फातिमा बेगम आज अपन बेटा यार मोहम्मद अउ बहू मदीना बानो के संग रहिथे। फातिमा के प्रधानमंत्री आवास योजना म साल 2019-20 म आवास स्वीकृति होइस। एकर पाछू आवास के किस्त आइस त वो ह दू कमरा के पक्का घर हाले म बनवाए हे। एखरे संग पक्का शौचालय घलोक बनवाए हे। फातिमा बेगम ल समाज कल्याण विभाग ले हर महिना 350 रु के पेंशन अउ खाद्य विभाग के माध्यम ले एक रूपिया किलो चावल घलोक मिलत हे।
प्रधानमंत्री आवास योजना ले खुद बर पक्का आवास बने म खुशी जाहिर करत फातिमा ह कहिस कि जीवन भर हम ह मजदूरी करेन अऊ मोर पति घलोक मजदूरी करत-करत मर गए। बेटा अउ बहू घलोक मजदूरी करथें। फेर हम बड़ मुश्किल ले अपन छोट कन कच्चा मकान म रहत रहेन। मजदूरी करके हम जिंदगी म कभू पक्का मकान नइ बना सकत रहेन। हमन कभू सोचे घलोक नइ रहेन के हमर पक्का मकान होही। आकाश म बादर छातेच हमर छाती धकधकाए लगय। कच्चा मकान म जगा-जगा पानी चूहय। पूरा भुइंया फींज जाए। कई पइत सोए बर जगा ही नइ बचत रहिस। आज पक्का घर बने ले बरसात म पानी के समस्या ले निजात मिल गए हे। बहुत-बहुत भला हो प्रधानमंत्री मोदी जी अऊ मुख्यमंत्री के जेमन हमला पक्का मकान दीस। अब पक्का घर म चैन के नींद आथे। सरकार ह पक्का घर देके बड़का उपकार करे गए हे।
फातिमा तो अब मेहनत के काम नइ कर सकय, फेर परिवार के आय म योगदान देहे बर वो चूड़ि बेचके (तुरकिन के काम) अपन जीवन यापन करत हे। बेटा-बहू मजदूरी म जाथ्े। प्रधानमंत्री आवास ह फातिमा बेगम के जीवन सुखमय बना देहे हे।
तुरकिन फातिमा के पहिली के कच्चा मकान