तसर पालन ले बीजापुर के ग्रामीण मन के बाढ़ही आमदनी

बीजापुर, छत्तीसगढ़ के बीजापुर जिला म तसर (कोसा) पालन ला बढ़ावा देहे खातिर भैरमगढ़ के कोसा बीज केंद्र म ग्रामीण अउ हितग्राही मन ला खास ट्रेनिंग देहे गे हे। ए पहल के तहत अर्जुन अउ साजा के 5,000 पौधा तियार करे गे हे, जेकर से स्थानीय स्तर म ग्रामीण मन बर रोजगार अउ आमदनी के नवा जरिया बनही।
बीजापुर जिला के गांव-देहात के इलाका मन म तसर पालन ला बढ़ावा देहे अउ हितग्राही मन के आमदनी बढ़ाय बर सासन के स्वस्थ डिम्ब समूह वितरण योजना ह बड़का भूमिका निभावत हे। योजना के तहत मिन्कापल्ली, कोत्तापल्ली, गुदमा अउ भैरमगढ़ क्षेत्र के रेशम हितग्राही मन ला 10 हजार स्वस्थ तसर डिम्ब समूह बांटे गे हे। ए पहल ले ग्रामीण परिवार मन ला तसर पालन के माध्यम ले उपरहा आमदनी अउ रोजगार के मउका मिलही।
योजना के तहत हितग्राही मन ला करीब 1.40 लाख रुपिया के शासकीय सब्सिडी के लाभ मिले हे। स्वस्थ अउ बने किसम के डिम्ब समूह मिले ले हितग्राही मन बढ़िया ढंग ले तसर पालन कर सकहीं। एकर से कम खरचा म जादा अउ सुग्घर कोसा उत्पादन मिले के संभावना बाढ़ जाही।
स्वस्थ डिम्ब समूह एसएमटीसी, चेन्नूर (तेलंगाना) ले मंगाके हितग्राही मन ला देहे गे हे। रेशम विभाग के तकनीकी विशेषज्ञ मन हितग्राही मन ला तसर पालन के वैज्ञानिक तकनीक के जानकारी देवत हें। उमन ला डिम्ब समूह के देखरेख, कीरा-मकोड़ा ले बचाव (कीट प्रबंधन), पौधा मन के सुरक्षा अउ तसर पालन के अलग-अलग पायदान के बारे म सिखाए जात हे।
विभाग कोती ले हितग्राही मन ला सरलग तकनीकी मार्गदर्शन देहे जात हे, ताकि स्वस्थ डिम्ब समूह के बढ़िया पालन करके जादा ले जादा कोसा उत्पादन करे जा सकय। गुणवत्तापूर्ण उत्पादन बढ़े ले ग्रामीण परिवार मन के उपरहा आमदनी म बढ़ोतरी होही अउ उमन ला गांव-घर म ही रोजगार के साधन घलो मिलही।
स्वस्थ डिम्ब समूह वितरण योजना बीजापुर के ग्रामीण हितग्राही मन ला अपन पुरखौती तसर पालन ला वैज्ञानिक तरीका ले आगू बढ़ाय के मउका देवत हे। गुणवत्तापूर्ण डिम्ब समूह, शासकीय सब्सिडी अउ तकनीकी सलाह के माध्यम ले तसर उत्पादक मन ला आर्थिक रूप ले मजबूत बनाए के कोसिस करे जात हे।
ये पहल सिरिफ जिला म तसर उत्पादन अउ ओकर गुणवत्ता बढ़ाय म मदद नइ करही, बल्कि ग्रामीण परिवार मन बर अतरिक्त आमदनी, रोजगार अउ आत्मनिर्भरता के नवा मउका घलो तियार करही।