युवक उपर चाकू ले हमला करइया दू आरोपी गिरफ्तार, घटना के बाद होगे रहिस फरार

रायपुर, 28 मई 2020। युवक उपर चाकू ले हमला करके फरार दू आरोपी मन ल पुलिस ह गिरफ्तारी करे हे. घटना 25 मई के रात के हे. गुढ़ियारी इलाका म फैजल अख्तर नाम के एक युवक उपर गोपाल ओझा अउ कुणाल टांडी ह चाकू ले हमला करे रहिस. हमला ले फैजल के पीठ म गंभीर चोट लगे रहिस. घटना के बाद ओला मेकाहारा अस्पताल म भर्ती कराये गये रहिस. गुढ़ियारी पुलिस ले मिले जानकारी के अनुसार, 25 मई के रात के रेलवे पटरी के तिर आरोपी गोपाल ओझा अउ कुणाल टांडी ह फैजल अख्तर नाम के युवक उपर आपसी रंजिश के चलत चाकू ले हमला कर दिये रहिस. ये हमला ले फैजल के पीठ म चाकू फंस गये रहिस. मेकाहारा अस्पताल म इलाज के बेरा ऑपरेशन करके पीठ म फंसे चाकू ल निकाले गिस. घटना के बाद ले दुनो आरोपी फरार रहिस, जोन मन ल पुलिस घेराबंदी करके गिरफ्तार करे हे.