शराब के तस्करी करत दू आरोपी गिरफ्तार, जब्त करे गिस मदिरा

राजनांदगांव, 23 सितंबर 2020। नव पदस्थ पुलिस अधीक्षक डी.श्रवण के निर्देश म अवैध मादक पदार्थ मन के बिक्री अउ परिवहन के खिलाफ लगातार कार्यवाही करे जावत हे। इही सिलसिला म गंडई थाना प्रभारी निरीक्षक सुषमा सिंह ल मुखबिर ले सूचना मिलिस कि मोटरसाइकिल म दू व्यक्ति शराब लेके दुर्ग डहर जावत हे। सूचना म प्रभारी निरीक्षक के नेतृत्व म थाना स्टाफ ह सादा वेशभूषा म दुर्ग रोड म नाकाबंदी करिन। ये दौरान एक मोटरसाइकिल क्रमांक CG07 BW 7365 ल रोक के पूछताछ करे गिस। उंखर पास ले 50 पौवा अंग्रेजी शराब जब्त करे गिस। एखर कोई विवरण आरोपी पेश नई कर पाइस। मामला म पुलिस ह मुकेश मानिकपुरी अउ खिलावन यादव दुनो निवासी दुर्ग ल गिरफ्तार करिन। आरोपी मन ऊपर धारा 34(2)आबकारी एक्ट के तहत न्यायालय पेश करे गिस।