रायपुर, 31 मई, 2024। मुख्यमंत्री श्री विष्णु देव साय ह आज इहां रायपुर स्थित भारतीय प्रबंधन संस्थान (आईआईएम) म आयोजित दू दिन के चिंतन शिविर के शुभारंभ करिन। चिंतन शिविर म मुख्यमंत्री श्री साय संग उप मुख्यमंत्री श्री अरुण साव अउ श्री विजय शर्मा अउ मंत्रिमंडल के आन सहयोगी भाग लेवत हें। पहिली सत्र ल नीति आयोग के सीईओ श्री बीवीआर सुब्रमण्यम ह संबोधित करिन। अपन संबोधन म श्री सुब्रमण्यम ह विकसित भारत के संकल्पना अऊ एला पाए के रणनीति के संबंध म विस्तार ले अपन बात रखिन। उमन कहिन कि बीते दस साल म प्रधानमंत्री श्री नरेंद्र मोदी के अगुवई म भारत तेजी से आगू बढ़े हे अऊ दुनिया के प्रमुख अर्थव्यवस्था मन म अपन जगा बनाए म सफल रहे हे। प्रधानमंत्री श्री मोदी ह विकसित भारत 2047 बनाए के संकल्प लेहे हे अऊ एला पूरा करे के रणनीति बनाय गए हे।
श्री सुब्रमण्यम ह अपन संबोधन म कहिन कि प्रधानमंत्री श्री मोदी स्केल, स्पीड अऊ इनोवेशन उपर जोर देवत हें। बदलत अंतराष्ट्रीय परिदृश्य अऊ समय ल देखत विकसित भारत के विजन तियार करे गए हे ताकि भारत अपन विशिष्ट जगा बना सकय। उमन कहिन कि अब दुनिया के निगाह ग्लोबल साउथ म हे। अब नजरिया पश्चिम ले पूर्व कोति देखे के हे अऊ भारत ए संभावना मन ल पूरा करे बर सक्षम हे। भारत के जनांकिकी, भारत के रणनीतिक स्थिति अऊ भारत म तेजी ले होए सुधार मन ले ए दिशा म आगू बढ़े बर भारत तैयार हे। चाहे डिजिटल इकानामी हो, या कर संबंधी सुधार हो। नवाचार ल बढ़ावा देना हो, भारत ये मां अग्रणी रहे हे अऊ अवइया समय म ए मन ल तेजी से बढ़ना हे। विकसित भारत सब बर समृद्धि लेके आवय, एखर बर काम करना हे। क्लाइमेट चेंज जइसे समस्या मन ल देखत ग्रीन एनर्जी ल बढ़ावा देवत सतत विकास के दिशा म काम करना हे। उमन कहिन कि जब हम विजन लेके चलथन त स्वाभाविक रूप ले हमला एक गाइड मैप मिल जाथे अऊ ए प्रकार ले हम बढ़त जाथन। श्री सुब्रमण्यम ह कहिन कि विकसित भारत के संकल्प पूरा करे म छत्तीसगढ़ के अहम भागीदारी होही। छत्तीसगढ़ म विकसित राज्य बने बर अऊ तीव्र विकास बर असीम संभावना हे अऊ ए दिशा म आगू बढ़के छत्तीसगढ़ अपन विकास के संग ही विकसित भारत के लक्ष्य ल पूरा करे म महत्वपूर्ण भूमिका निभाही।
सबो मंत्री मन ह गोठ-बात म भागीदारी करत छत्तीसगढ़ म ए संबंध म बनाए जात नीति मन के बारे म बताइन। संगेच उमन श्री सुब्रमण्यम के आगू अपन जिज्ञासा घलोक रखीन जेन विकसित छत्तीसगढ़ अऊ विकसित भारत के उद्देश्य ल ध्यान म रखत सार्थक परिचर्चा होइस। जानबा हे के दू दिन के ए चिंतन शिविर म छत्तीसगढ़ के विजन बर सार्थक विमर्श होना हे। संगेच संसाधन मन के सतत उपयोग अउ योजना मन के अभिसरण संग विविध विषय मन उपर चर्चा होही।
चिंतन शिविर म कृषि मंत्री श्री रामविचार नेताम, वन अउ जलवायु बदलाव मंत्री श्री केदार कश्यप, खाद्य मंत्री श्री दयालदास बघेल, स्वास्थ्य मंत्री श्री श्याम बिहारी जायसवाल,उद्योग मंत्री श्री लखनलाल देवांगन, वित्त मंत्री श्री ओपी चौधरी, महिला अउ बाल विकास मंत्री श्रीमती लक्ष्मी रजवाड़े, खेल अउ युवा कल्याण मंत्री श्री टंकराम वर्मा मौजूद रहिन।