शराब पीये ले दू लोगन के मउत, जांच म जुटीस पुलिस

महासमुंद, 30 जनवरी 2021। जिला के ग्राम परसवानी म शुक्रवार केे दू लोगन के लाश मिले ले सनसनी फैलगे। ग्रामीण मन के कहना हे कि दुनों के शराब पीये ले मउत होगे। मामला सिटी कोतवाली थाना क्षेत्र के ग्राम परसवानी के हे। सिटी कोतवाली प्रभारी शेरसिंग बंदे ह बतइन कि शुक्रवार बिहनिया मृतक मन के परिजन मन ह सूचना देहे रहिस। परिजन मन के सूचना म पुलिस मउका म पहुंच के मामला म जानकारी लीन। पुलिस ल ग्रामीण मन ह जानकारी दीस कि मंगलू यादव अउ अशोक यादव ल ग्रामीण मन ह मंगलू यादव के घर के आसपास मृत पाये हे। ग्रामीण मन ह पुलिस ल ये भी जानकारी दीस हे कि गुरूवार ले शुक्रवार बिहनिया तक बिना खाए दुनों शराब पीयत रहे। पुलिस ह बतइन कि शराब के जादा सेवन ले दुनों के मउत होय होही। सिटी कोतवाली प्रभारी ह जानकारी दीन कि पुलिस ह मृतक मन के आसपास शराब के खाली बोतल जब्त करके जांच बर भेजे जावत हे। लाश के पोस्टमार्टम करा के पुलिस जांच म जुटगे हे।