कोरबा के दू वकील गिरफ्तार, IAS बताके मांगत रहिन VIP सुविधा

कोरबा, खुद ल आईएएस अफसर बताके रौब झड़इया कोरबा जिला के दू वकील गुजरात म गिरफ्तार करके जेल भेजे गए हें। एक वेबपोर्टल म छपे खभर के मुताबिक कोरबा जिला न्यायालय म प्रशिक्षु अधिवक्ता मन ह खुद ल आईएएस अफसर बता के सोमनाथ मंदिर म वीआईपी सुविधा मांगत रहिन। ये फर्जीवाड़ा म ए दुनों ल गिरफ्तार कर ले गए हे। जानबा हे के इंकर संग म एक महिला प्रथम श्रेणी जेएमएफसी घलोक रहिन।
मिले जानकारी के मुताबिक प्रशिक्षु अधिवक्ता शरद पांडेय अऊ ओखर भाई रवि पांडेय दुनों कोरबा के रहवईया अऊ जेएमएफसी प्रथम श्रेणी महिला गुजरात गए रहिन। रायपुर ले अहमदाबाद पहुंचे के बाद उमन खुद ल रेलवे के डीसीएम बताके रेलवे गेस्ट हाउस म कमरा के व्यवस्था कराईन। शरद अऊ रवि पांडेय ह द्वारका म मंदिर घूमे के बेरा म अपन परिचय आईएएस अफसर के रूप म देवत रहिस। अतकेच नहीं उमन कभू खुद ल कलेक्टर त कभू एसडीएम तको बताइवयं। शरद खुद ल हाई कोर्ट के मजिस्ट्रेट बतावय अऊ जल्दी प्रमोशन होके सुप्रीम कोर्ट के मजिस्ट्रेट बने के रौब देखावय। वो ह दिल्ली के कानून विभाग म डिप्टी सेक्रेटरी तको हंव कहय। अइसनहे फर्जी पद मन के रौब देखात ये दुनों सोमनाथ मंदिर म दर्शन बर वीआईपी ट्रीटमेंट हासिल करे के कोसिस करत पकड़ा गयं।
गिर-सोमनाथ के एडिशनल एसपी ओमप्रकाश जाट के बताती द्वारिका पुलिस ले ओ मन ल सूचना मिलीस के व्हीआईपी ट्रीटमेंट हासिल करे बर रूम बुक करे बर दू मनखे संदेहास्पद प्रतीत होवत हें। सूचना म ए दुनों के तस्दीक कराए गीस त जम्‍मो फर्जीवाड़ा आगू आ गे अऊ ये मन कोरबा के प्रशिक्षु अधिवक्ता निकलिन। 26 दिसम्बर के गुजरात पुलिस ह इंकर विरुद्ध धारा 170, 419, 114 भादवि के तहत अपराध पंजीबद्ध करके जेल दाखिल करा दीस।
हिन्‍दी म ये समचार ल आप ये दे https://khatpatnews.com/archives/23392 कड़ी ले पढ़ सकत हव।