रायपुर, 20 अगस्त 2020। राज्य के उदंती-सीतानदी टायगर रिजर्व म 18 अगस्त के दिन यादगार होगे जब इहां वनभैंसा के कुनबा म दू नवा मेहमान आइस। दू मादा वनभैंसा म ले एक मादा वनभैंसा ह बिहनिया 8 बजे मादा बच्चा अउ दूसरा मादा वनभैंसा ह रात्रि 9 बजे नर बच्चा ल जनम दिस।
अपर मुख्य प्रधान वनसंरक्षक (वन्यप्राणी) श्री अरूण पाण्डेय ह बताइस कि सबो जच्चा-बच्चा वनभैंसा स्वस्थ हे। इंखर स्वास्थ्य परीक्षण करके जरूरी दवाई अउ पोषक आहार उपलब्ध कराये गे हे। बता देथन कि छत्तीसगढ़ राज्य के राजकीय पशु वनभैंसा दुर्लभ अउ संकटग्रस्त वन्यजीव मन म सामिल हे। ये दृष्टि ले राज्य के वनभैंसा मन के विशेष महत्व हे अउ उंखर संरक्षण अउ संवर्धन के हरसंभव प्रयास करे जावत हे। उदंती-सीतानदी टायगर रिजर्व म वर्तमान म 10 वनभैंसा हे, जोन म 9 नर वनभैंसा अउ एक मादा वनभैंसा हे।
उमन बताइस कि वनभैंसा मन के संबंध म वाईल्ड लाईफ ट्रस्ट ऑफ इंडिया के संग गवर्निंग कौंसिल के चौथा बैठक सितंबर 2009 म आयोजित करे गे रिहिस। एमा सलाह दे गे रिहिस कि जंगल म स्वतंत्र रूप ले विचरण करत नर वनभैंसा अउ पालतू मादा वनभैंसा के क्रास ले उत्पन्न होए बच्चा म घलो वनभैंसा मन के जीन हे, एमन ल घलो संरक्षित करे के जरूरत हे। इही कड़ी म वनभैंसा जुगाड़ अउ जांगड़ा गांव के दू मादा वनभैंसा ले क्रास तथा उत्पन्न होए मादा वनभैंसा के पहिचान करे गे रिहिस। एखर पश्चात् ये दुनो मादा वनभैंसा राजा नाम के वनभैंसा ले घलो क्रास होइस अउ उंखर ले दू मादा पड़िया के जनम होइस। पिछला साल एला उंखर बच्चा सहित लाकर उंदती-सीतानदी टायगर रिजर्व के पृथक बाड़ा म रखे गे गिस अउ मोहन नाम के नर वनभैंसा ले उंखर प्रजनन कराये गिस। उक्त दुनो मादा वनभैंसा ह 18 अगस्त के दू स्वस्थ बच्चा मन ल जनम दिस हे।
