उज्ज्वला योजना ले आसान होइस रसोई के काम, मिलिस सुरक्षित भविष्य
कबीरधाम, सफा रंधनी खोली सिरिफ सुबिधा नोहे, बल्कि सुग्घर जिनगी अउ सम्मानजनक रहनसहन के चिनहा आय। परम्परागत चूल्हा के धुंगिया ले जूझत महिला मन ल राहत देहे बर चलत उज्ज्वला योजना 3.0 आज गरीब अउ ग्रामीण परिवार मन के जिनगी म बढ़िया बदलाव लावत हे। ए योजना के माध्यम ले माईलोगन मन ल धुंगिया ले मुक्ति , बने सेहत अउ सुरक्षित रसोई के लाभ मिलत हे।
कबीरधाम जिला म प्रधानमंत्री उज्ज्वला योजना 3.0 के तहत 1339 नवा गैस कनेक्शन पात्र हितग्राही मन ल देहे गे हे। ए कनेक्शन मन ले उही परिवार मन ल सबले जादा राहत मिले हे, जेमन अभी तक लकड़ी, छेना या कोइला ले खाना बनाय बर मजबूर रहिन। गैस कनेक्शन मिले ले महिला मन ल धुंगिया ले छुटकारा मिले हे अउ रसोई के काम घलो पहिली ले आसान अउ सुरक्षित हो गे हे। ए योजना प्रधानमंत्री श्री नरेन्द्र मोदी के अगुवाई म गरीब परिवार के महिला मन ल सफा ईंधन पहुँचाए के उदेस्य ले चलाय जात हे। योजना ले नइ केवल स्वास्थ्य के रक्षा होवत हे, बल्कि महिला मन के बखत घलो बाचत हे, जेला उमन अब लइका मन के पढ़ाई, स्वरोजगार या अउ कोनो काम म लगा पावत हें।
ग्रामीण इलाका मन म उज्ज्वला योजना ह सामाजिक बदलाव घलो लाए हे। पहिली जिहाँ महिला मन ल ईंधन बर जंगल मन म घंटा भर भटके बर परत रहिस, उहें अब घर बइठे सुरक्षित अउ सफा ईंधन मिलत हे। एखर ले महिला मन के सुरक्षा घलो बाढ़े हे अउ जिनगी के स्तर म सुधार आए हे। उज्ज्वला योजना 3.0 के तहत देहे गे ए नवा कनेक्शन मन सिरिफ गैस सिलेंडर नोहे, बल्कि बने सेहत, सम्मान अउ सुबिधा वाले जिनगी डहार बढ़ाय गे एक बड़का कदम आय। ए योजना असल म महिला मन के सशक्तिकरण अउ स्वच्छ भारत के सपना ल पूरा करे म बड़का भूमिका निभावत हे।
उज्ज्वला योजना पात्रता के नवा नियम
उज्ज्वला योजना 3.0 बर अइसन सबो मनखे पात्र होही जिंकर:
महीना के आय 10 हजार रूपया ले कम हो।
व्यावसायिक कर या आयकर (Income Tax) पटइया नइ हो।
परिवार के कोनो सदस्य सरकारी नौकरी म झन हो।
पंजीकृत गैरकृषि काम धंधा वाला परिवार झन हो।
50,000 रूपया ले जादा के लिमिट वाला किसान क्रेडिट कार्ड झन हो।
एक सिंचाई मशीन के संग 2.5 एकड़ ले जादा सिंचित खेत झन हो।
7.5 एकड़ ले जादा के खेत के मालिक झन हो।
30 वर्ग मीटर ले बड़े पक्का मकान झन हो (सरकारी योजना ले मिले घर ल छोड़ के)।
गाड़ी (3 या 4 चक्का), मछली पकड़े के नाव या खेती के बड़े मशीन झन हो।
पहिली ले कोनो एल.पी.जी. कनेक्शन झन हो।
