साफ ईंधन ले मिलिस राहत, सेहत अउ सम्मान वाला जिनगी के नवा शुरुआत
बेमेतरा, जिला के ग्राम देवरबीजा म रहइया द्रोपदी यादव के जिनगी म प्रधानमंत्री उज्ज्वला योजना ह एक सकारात्मक बदलाव लाए हे। भारत सरकार के ए महत्वकांक्षी योजना के अंतर्गत वोला मुफत म एलपीजी गैस कनेक्शन मिलिस, जेकर से कइ बछर ले धुंगिया वाले चूलहा म रांधे के मजबूरी खतम हो गे।
गैस कनेक्शन मिले के बाद द्रोपदी यादव अउ वोकर परिवार ल साफ-सुथरा, सुरक्षित अउ सुविधाजनक ईंधन मिले हे। एकर ले न सिरिफ रंधनी के वातावरण साफ होए हे, भलुक महिला मन के सेहत, समय अउ जीवन स्तर म घलो बढ़िया सुधार देखे ल मिलत हे। अब उनला लकड़ी, कोइला या छेना के व्यवस्था बर दूरिहा जाय ल नइ परय, जेकर से उंकर रोज के जीवन पहिली ले जादा सरल अउ सुरक्षित हो गे हे।
गैस कनेक्शन मिले म द्रोपदी यादव ह भावुक होवत कहिस के ‘उज्ज्वला योजना ह मोर रंधनी के संगे-संग मोर जिनगी घलो बदल देहे हे। अब धुआं ले आंखी करूवाना अउ खांसी आए जइसे समस्या नइ होवय। समय बांचथे, जेला मैं अपन परिवार अउ लइका मन संग बिता पाथौं।’ ओ ए जनकल्याणकारी योजना बर राज्य शासन अउ केंद्र सरकार के आभार जताइस।
उज्ज्वला योजना के मुख्य उद्देश्य आर्थिक रूप ले कमजोर परिवार के महिला मन ल साफ ईंधन देके उनला धुंगिया ले होवइया बीमारी ले बचाना अउ जिनगी ल आसान बनाना ए। ए योजना के तहत गैस कनेक्शन मिले ले द्रोपदी यादव जइसे कतको महिला मन ल स्वास्थ्य सुरक्षा के संग-संग सम्मानजनक जिनगी जिये के मौका मिले हे।
ग्राम देवरबीजा म द्रोपदी यादव ल गैस कनेक्शन मिले के बाद आन गांव वाले महिला मन म घलो योजना ल लेके जागरूकता अउ उत्साह देखे जावत हे। महिला मन आघू बढ़के आवेदन करत हें अउ योजना के लाभ लेवत हें। द्रोपदी यादव के ए कहानी उज्ज्वला योजना के सही क्रियान्वयन अउ ग्रामीण महिला मन के सशक्तिकरण के एक प्रेरक मिसाल बनके आघू आए हे।
