CHHATTISGARHI NEWS: गौरेला-पेंड्रा-मरवाही, छत्तीसगढ़ के प्राकृतिक सुंदरता, ग्रामीण जीवनशैली अऊ लोक संस्कृति ह अब देश के संगे-संग विदेशी सैलानी मन ल घलो अपन कोति आकर्षित करत हे। इही कड़ी म गौरेला-पेंड्रा-मरवाही जिला के लमना विलेज स्टे म ब्रिटेन ले पहुंचे विदेशी मेहमान मन के प्रवास छत्तीसगढ़ के बदलत पर्यटन तस्वीर के जीवंत मिसाल बनगे हे।
ब्रिटेन ले आए श्री फ्रैंक रोजर मार्सटन अऊ श्रीमती जेनिफर मार्गरेट रेनफ्रू मार्सटन जब लमना गांव पहुंचिन, त गांव वाले मन ह पारंपरिक आत्मीयता के संग तिलक लगा के अऊ ढोल-नगाड़ा के थाप म उंकर स्वागत करिन। विदेशी पहुना मन ह घलो ग्रामीण मन के ये आत्मीय स्वागत के आनंद लीन अऊ उहां के मनखे मन के संग घुल-मिल के छत्तीसगढ़ी संस्कृति ला नजदीक ले महसूस करिन।
लमना विलेज स्टे म अतिथि मन ल गांव के गली, खेत-खलिहान अऊ स्थानीय जीवन ले परिचित करावत ‘विलेज वॉक’ कराए गीस। ए बेरा म पहुना मन गांव के परिवार, महिला मन अऊ लइका मन के संग आत्मीय गोठ-बात करिन। ग्रामीण हाट-बाजार के भ्रमण ह विदेशी मेहमान मन बर खास आकर्षण के केंद्र रहिस। हाट म ओ मन माटी के बर्तन, बांस के समान, स्थानीय उत्पाद अऊ सब्जी मन ला देखिन अऊ ग्रामीण जीवन के वास्तविक अनुभव लीन।
छत्तीसगढ़ म पर्यटन अब सिरिफ दर्शनीय स्थल तक सीमित नइ हे, बल्कि अनुभव आधारित पर्यटन के रूप म विस्तार पावत हे। लमना जइसे ग्रामीण पर्यटन केंद्र सैलानी मन ल प्रकृति अऊ स्थानीय संस्कृति ले जोड़े म महत्वपूर्ण भूमिका निभावत हे। एखर से ग्रामीण इलाका म रोजगार अऊ उद्यमिता के नवा अवसर बनत हे, जेकर से स्थानीय अर्थव्यवस्था मजबूत होत हे।
अंगरेज मन ल लोभावत हे छत्तीसगढ़ के गांव, लमना विलेज स्टे म मोहाए हें पर्यटक
Chhattisgarh Rural Tourism
