कलेक्टर ह उल्लास साक्षरता के दीन जानकारी, प्रोत्साहन म आवेदक ह सीखीस लिखना, अंगूठा लगाय के बजाय हस्ताक्षर करके दीस अपन आवेदन
अम्बिकापुर 16 जुलाई 2024। कलेक्टर सरगुजा श्री विलास भोसकर के अध्यक्षता म हरेक मंगलवार समयसीमा के बैठक के बाद कलेक्टर जनदर्शन आयोजित करे जात हे। कलेक्टर जनदर्शन म फरियादी अपन आवेदन लेके पहुंचत हें जिनकर निराकरण बर कलेक्टर ह संबंधित अधिकारी मन ल निर्देशित करत हें। आज मंगलवार के पहिली जइसे जनदर्शन चलत रहिस अऊ आवेदन लेहे जात रहिस। इही बीच लखनपुर विकासखंड के ईरगवां गांव ले आवेदक पंडित दास अपन आवेदन लेके पहुंचे रहिस। कलेक्टर ह आवेदक के आवेदन लीन अऊ जब आवदेक के हस्ताक्षर के जगा अंगूठा के छाप देखीन, त पंडित दास ले वोखर शिक्षा के जानकारी लीन। आवेदक ह बताइस के ओ पढ़े लिखे नइ हे, ते पाए के अंगूठा लगाथे। ए बात म कलेक्टर ह ओ ल शासन के उल्लास नवभारत साक्षरता कार्यक्रम Ullas Navbharat Literacy Program के बारे म बताइन अऊ पढ़ना लिखना सीखे के अपील करिन। कलेक्टर ह ओ ल अपन नाम लिखे सीखे बर प्रेरित करिन जेखर असर होइस अउ जनदर्शन खतम होए के पहिलीच पंडित दास अपन नाम लिखना सीख गे। वो ह साक्षरता अभियान के तहत साक्षरता कार्यालय म कर्मचारी मन के मदद ले अपन नाम लिखना सीखीस अऊ आखिर म अंगूठा लगाय के बजाय कलेक्टर के आगू धीरे-धीरे हस्ताक्षर करके फेर अपन आवेदन प्रस्तुत करिस।
कलेक्टर ह साक्षरता के जिला परियोजना अधिकारी श्री गिरीश गुप्ता ल ग्राम इरगवां म साक्षरता कक्षा संचालन बर जरूरी निर्देश घलोक दीन। कलेक्टर अउ जन दर्शन म उपस्थित सबो विभागीय अधिकारी मन ह ताली बजाके श्री दास ल शिक्षा प्राप्त करे बर प्रोत्साहित करिन।
