स्वच्छ भारत मिशन ह एडवाइजरी के पालन सुनिश्चित करे बर सबो कलेक्टर मन अऊ जिला पंचायत के मुख्य कार्यपालन अधिकारी मन ल जारी करिस परिपत्र
रायपुर, 19 मार्च 2020। कोरोना वायरस के संक्रमण रोके बर संयुक्त राष्ट्र संघ के संस्था यूनिसेफ ह साबुन ले हाथ धोए के प्रभावी तरीका मन के बारे म एडवाइजरी जारी करे हे। राज्य स्वच्छ भारत मिशन (ग्रामीण) ह ये एडवाइजरी के पालन ठउका करे अऊ साबुन ले हाथ धुलाई ल बढ़ावा देहे बर सबो जिला मन के कलेक्टर-सह-अध्यक्ष, प्रबंधन समिति, जिला स्वच्छ भारत मिशन अऊ जिला पंचायत के मुख्य कार्यपालन अधिकारी-सह-सदस्य सचिव, जिला स्वच्छ भारत मिशन मन ल परिपत्र जारी करे हे। स्वच्छ भारत मिशन (ग्रामीण) के संचालक श्री धर्मेश साहू ह हर गांव म सक्रिय स्वच्छाग्राही मन के माध्यम ले कोरोना वायरस संक्रमण ल रोके बर मनखे मन ल साबुन ले हाथ धुलाई बर प्रेरित करे के संगेच मीडिया के संग एडवाइजरी के व्यापक प्रचार-प्रसार करे ल कहे हें।
यूनिसेफ कोति ले जारी मार्गदर्शिका म कहे गए हे कि कोरोना वायरस (COVID-19) महामारी के कारण पूरा दुनिया ये समय स्वास्थ्य आपातकाल के सामना करत हे। बलगम, खांसी या छींक ले निकलइया ड्रॉपलेट्स ले वायरस के आंख, नाक या गला के माध्यम ले शरीर म प्रवेश करे ले ये श्वास संबंधी वायरस मानव शरीर ल संक्रमित करथे। एक मनखे ले दूसर मनखे म ये संक्रमण अधिकांशतः हाथ ले फैलथे। ये वैश्विक महामारी ल रोके के सबले आसान, सस्ता अऊ प्रभावी तरीका साबुन अउ पानी ले घेरी-बेरी हाथ धोना हे।
हाथ कब धोना चाही?
हाथ के बने सहिन सफाई बर साबुन अऊ पानी ले हाथ धोना चाही। शौच के अऊ शिशु के मल साफ करे के बाद, भोजन करे, खाना बनाए, परोसे, शिशु ल खाना खवाए अऊ स्तनपान के पहिली हाथ धोना चाही। पशु अउ पालतू जानवर मन ल छूए अऊ साफ-सफाई के काम के बाद अऊ कहूं हाथ गंदा दिखय, त हाथ जरूर साफ करना चाही।
कोरोना वायरस ले बचाव बर नाक बोहाए, खांसे, छींके, सार्वजनिक जगा जइसे बाजार अउ पूजास्थल ले लहुटे या सार्वजनिक यातायात के साधन मन के उपयोग के बाद हाथ धोना चाही। घर के बाहिर कोनो चीज, रूपया या सतह ल छूए के बाद अऊ कोनो बीमार मनखे के देखभाल के पहिली, देखभाल के समय अऊ देखभाल के बाद बने सहिन हाथ जरूर धोना चाही।
हाथ कइसे धोवयं?
साबुन अऊ पानी ले 20 ले 30 सेकंड तक हाथ बने सहिन साफ करना चाही। प्रभावी सफाई बर पहिली हाथ ल पानी ले भिंजोवव अऊ फेर बनेच साबुन लगावव। हथेली मन के भीतर अउ ऊपर दुनों सतह मन ल रगड़यं। सबो अंगरी मन के जोड़ मन अऊ नख मन ल घलोक रगड़यं। अंगरी मन ल हाथ जोरे के अवस्था म रखत कलाई मन ल रगड़यं फेर हाथ ल साफ पानी ले धोवयं। आखर म हाथ ल हवा म सुखावयं या साफ सूक्खा पंछा ले पोंछयं।
कीटाणु भींजे त्वचा म आसानी ले फैलथे। ए खातिर हाथ ल पूरा सुखाना बहुत महत्वपूर्ण हे। हाथ ल हवा म, टिशु पेपर या साफ कपड़ा के उपयोग करके सुखाना चाही।