यूनिसेफ ह दंतेवाड़ा के स्कूल मन म चलत किचन-गार्डन बागवानी ल सहराइस

रायपुर, अंतराष्ट्रीय संस्था यूनिसेफ ह अपन ट्वीटर अउर फेसबुक एकाउंट म छत्तीसगढ़ के आदिवासी बहुल दंतेवाड़ा जिला के प्राथमिक शाला बेंगलुरू म चलत किचन गार्डन बागवानी के सराहना करे हे। यूनिसेफ ह ‘फॉर एव्हरी चाइल्ड, न्यूट्रीशन‘ अऊ ‘मन्डे मोटिवेशन‘ हैशटैग के संग छात्रा के सब्जी धरे फोटो शेयर करत लिखे हे कि छत्तीसगढ़ के प्राथमिक शाला बेंगलूर म लइका पोषण अऊ आहार के संबंध म अनूठा सीख लेवत हें। ओ मन स्कूल के किचन गार्डन म अपन शिक्षक मन के संग खुद अपन बर साग-भाजी उगाथें।
मुख्यमंत्री श्री भूपेश बघेल ह घलोक यूनिसेफ के ट्वीट ल रीट्वीट करत लिखे हे कि मनखे मन के सहयोग ले हम छत्तीसगढ़ ले कुपोषण अऊ एनीमिया दूर करे बर संकल्पित हन। हमला विश्वास हे कि निश्चित ही ये मा सफल होही। एखर पहिली नीति आयोग ह घलोक अपन मुख्य पेज म छत्तीसगढ़ के दंतेवाड़ा ल जगा दे रहिस। मुख्यमंत्री के कुपोषण मुक्ति के दिशा म करे गए प्रयास मन के परिणाम हे कि पाछू दिन देश के 115 आकांक्षी जिला मन म ले दंतेवाड़ा जिला ल सुपोषण अभियान म उल्लेखनीय उपलब्धि अऊ नवोन्मेषी पहल बर नई दिल्ली म स्कॉच अवार्ड समारोह म सिल्वर अवार्ड ले नवाजे गए रहिस हे।
हम आप ल बता दन कि मुख्यमंत्री श्री भूपेश बघेल कोति ले प्रदेश ले कुपोषण उन्मूलन बर विशेष अभियान चलाय जात हे, एखर बर कई विभाग कोति ले संघरा प्रयास करे जात हे।