छत्तीसगढ़ ले माओवादी समस्या के समूल उन्मूलन उपर दे गीस जोर
रायपुर, 28 जून 2024। मुख्यमंत्री श्री विष्णु देव साय ह आज सर्किट हाउस रायपुर म आयोजित यूनिफाईड कमाण्ड के बैठक म कहिन कि छत्तीसगढ़ राज्य म माओवादी गतिविधि मन म सरलग कमी आवत हे। राज्य म केन्द्रीय सुरक्षा बल मन अऊ छत्तीसगढ़ पुलिस से बेहतर तालमेल के संग माओवादी मन के विरूद्ध सफलतापूर्वक चलाये जात संयुक्त अभियान के सेती ये संभव हो सके हे। माओवादी (Maoists) मन के विरूद्ध चलाये जात सघन अभियान के संगे-संग शासन के नवा ‘‘नियद नेल्लानार योजना‘‘ (Niyadha Nellanar Scheme) के तहत विकास काम मन म घलोक तेजी लाए जात हे, जेखर से आम जनता के शासन प्रशासन के प्रति विश्वास बाढ़े हे।
मुख्यमंत्री श्री साय ह माओवाद प्रभावित क्षेत्र मन म विकास काम मन ल प्राथमिकता देवत सुचारू आवागमन बर सड़क, पुल-पुलिया अउ आन शासकीय निर्माण काम मन ल उच्च गुणवत्ता के संग निरधारित समय सीमा म पूरा करे के निर्देश दीन। माओवाद प्रभावित क्षेत्र मन म संचालित निर्माण काम मन ल जल्दी पूरा करे बर जरूरी सुरक्षा व्यवस्था उपलब्ध कराए के घलोक निर्देश मुख्यमंत्री श्री साय ह दीन।
बैठक म माओवाद प्रभावित क्षेत्र मन म पुलिस के सूचना तंत्र (Police information system) ल अऊ जादा मजबूत बनाये अउ स्थानीय गांव वाले मन ल विश्वास म लेके माओवाद के विरूद्ध अभियान चलाय के निर्देश देहे गीस। संगेच माओवाद प्रभावित क्षेत्र मन म तैनात केन्द्रीय अऊ राज्य के सुरक्षा बल मन के जवान मन के समस्या ल लेके घलोक चर्चा करिन अउ सुरक्षा बल मन के कैम्प म जवान मन ल जरूरी मूलभूत सुविधा अऊ संसाधन उपलब्ध कराए के निर्देश दीन। बैठक म छत्तीसगढ़ राज्य के सीमावर्ती राज्य विशेषतः महाराष्ट्र, तेलंगाना, आन्ध्रप्रदेश अऊ उड़ीसा के संग बेहतर समन्वय, सीमावर्ती क्षेत्र मन म संयुक्त कार्यवाही, सम्पर्क मार्ग मन म सुरक्षा बल मन कोति ले सतत निगरानी के निर्देश देहे गीस अऊ सीमावर्ती राज्य मन के संग सूचना मन ल साझा करे म घलोक जोर दे गीस। संगेच ये घलोक निर्देश दे गीस कि माओवादी मन के विरूद्ध चलाये जात अभियान म ये सुनिश्चित करे जाए कि स्थानीय गांव वाले मन ल कोनो प्रकार के असुविधा झन होवय।
बैठक म उप मुख्यमंत्री अउ गृह मंत्री श्री विजय शर्मा, मुख्य सचिव श्री अमिताभ जैन, पुलिस महानिदेशक श्री अशोक जुनेजा, अपर मुख्य सचिव (गृह) श्री मनोज पिंगुआ, केन्द्रीय गृह मंत्रालय अउ राज्य शासन, केन्द्रीय सुरक्षा बल मन अउ राज्य पुलिस के वरिष्ठ अधिकारी अउ कई ठन विकास एजेंसी मन के वरिष्ठ अधिकारीगण उपस्थित रहिन।
