केंद्रीय गृह मंत्री श्री अमित शाह ह कहिन – देश ल अपन वीर जवान मन उपर भरोसा हे अऊ उन उपर गरब घलोक हे
ये बेरा म उपमुख्यमंत्री अउ गृहमंत्री विजय शर्मा रहिन उपस्थित: जवान मन के बढ़ाइन हौसला
रायपुर 16 मई 2025/ केन्द्रीय गृह अउ सहकारिता मंत्री श्री अमित शाह ह काली नवा दिल्ली के एम्स ट्रॉमा सेंटर के दौरा करिन अऊ छत्तीसगढ़-तेलंगाना सीमा म करेगुट्टा पहाड़ी मन म 31 नक्सली मन ल मार गिरात बेरा नक्सल विरोधी अभियान म सुरक्षा बल मन के घायल जवान मन ले मुलाकात करिन। ए बेरा म उपमुख्यमंत्री अउ गृहमंत्री श्री विजय शर्मा उपस्थित रहिन।
केंद्रीय गृह मंत्री श्री अमित शाह ह कहिन के हमार सुरक्षा बल अपन वीरता ले नक्सलवाद के नामोनिशान मिटावत हे। उमन कहिन के आज दिल्ली के एम्स ट्रॉमा सेंटर म जाके उन सुरक्षाकर्मी मन ले मुलाकात करेंव जेन मन छत्तीसगढ़-तेलंगाना सीमा म करेगुट्टा पहाड़ी मन म 31 नक्सली मन ल मार गिरात खानी नक्सल विरोधी अभियान म घायल होए रहिन। केंद्रीय गृह मंत्री श्री अमित शाह ह ऊंखर स्वास्थ्य के बारे म जानकारी लीन अऊ ओ मन ल भरोसा देवाइन के देश ल उनखर उपर भरोसा अऊ गरब हे।
केंद्रीय गृह मंत्री श्री अमित शाह ह कहिन के वीर जवान मन ह छत्तीसगढ़-तेलंगाना सीमा म सरलग 21 दिन तक ऑपरेशन चलाके 31 नक्सली मन ल मारे हें। जवान मन के ए शौर्य अऊ साहस उपर पूरा देश ल गरब हे।
उपमुख्यमंत्री श्री विजय शर्मा ह घायल जवान मन के स्वास्थ्य के जानकारी लीन अऊ उंखर हौंसला बढ़ाइन। उमन कहिन के हमार वीर जवान मन के चेहरा म मुस्कान देखके गरब होथे। आप मन के बांहीं के ताकत अऊ साहस ल पूरा देश देखत हे। उमन जवान मन के साहस अऊ समर्पण ल प्रणाम करत जवान मन के जल्दी स्वस्थ होए के कामना करिन।
