मुख्यमंत्री श्री विष्णु देव साय ले केंद्रीय संचार अऊ ग्रामीण विकास राज्य मंत्री डॉ. चन्द्रशेखर पेम्मासानी ह करिन सौजन्य मुलाक़ात

रायपुर, मुख्यमंत्री श्री विष्णु देव साय ले आज राजधानी रायपुर स्थित मुख्यमंत्री निवास कार्यालय म भारत सरकार के केंद्रीय संचार अऊ ग्रामीण विकास राज्य मंत्री डॉ. चन्द्रशेखर पेम्मासानी ह सौजन्य भेंट करिन। ए बेरा म दुनों नेता मन के बीच ग्रामीण विकास, केंद्र अऊ राज्य सरकार के योजना मन के समन्वित क्रियान्वयन, आदिवासी अंचल मन म संचार सुविधा मन के सुदृढ़ीकरण अऊ माओवाद प्रभावित क्षेत्र मन म चलत विकास काम मन ल लेके परखर गोठ-बात होइस।
मुख्यमंत्री श्री साय ह प्रधानमंत्री श्री नरेंद्र मोदी के विकासोन्मुखी दृष्टिकोण ल धरातल म साकार करे बर राज्य सरकार कोतिले करे जात उदीम मन के जानकारी दीन। उमन बताइन के हमर सरकार बने के बाद पहली कैबिनेट बैठक म 18 लाख पक्‍का मकान मन के स्वीकृति देहे गीस, जेखर से प्रदेश के गरीब परिवार मन के घर के सपना पूरा होइस हे। उमन कहिन के बैंकिंग सेवा के सुदृढ़ीकरण बर 1,460 ग्राम पंचायत मन म अटल डिजिटल सेवा केंद्र सुरू करे गए हे, जेखर से ग्रामीण जनसंख्या ल सहज अऊ सुलभ बैंकिंग सुविधा मिलत हे।
मुख्यमंत्री श्री साय ह महिला मन के आर्थिक सशक्तिकरण के दिशा म उठाए गए कदम मन के चर्चा करत बताइन के राज्य सरकार ह कौशल विकास अऊ नवाचार ल प्रोत्साहित करत हे। ग्रामीण अंचल मन म महिला स्व-सहायता समूह मन कोति ले करे जात काम मन ह आत्मनिर्भरता के नवा मिसाल कायम करे हे।
केंद्रीय राज्य मंत्री डॉ. चन्द्रशेखर पेम्मासानी ह मुख्यमंत्री श्री साय ल अपन नारायणपुर अऊ मोहला-मानपुर-अंबागढ़ चौकी जिला मन के दौरा के जानकारी दीन। उमन कहिन के ए क्षेत्र मन म केंद्र सरकार के योजना मन प्रभावी ढंग ले क्रियान्वित होवत हे अऊ स्थानीय जनता ल एकर सीधा लाभ मिलत हे। डॉ. पेम्मासानी ह माओवादी क्षेत्र मन म तीव्र गति ले होवत सकारात्मक बदलाव के सराहना करत एला छत्तीसगढ़ के उज्ज्वल भविष्य के संकेत बताइन। उमन ‘बिहान’ योजना के अंतर्गत महिला स्व-सहायता समूह मन कोति ले आयोजित प्रदर्शनी के उल्लेख करत कहिन के समूह के दीदी मन कोति ले तियार करे बेलमेटल, मिलेट्स अऊ घरेलू उत्पाद मन के गुणवत्ता बहुत सराहनीय हे। उमन कहिन के ए समूह मन के महिला मन 15 ले 20 हजार रूपिया मासिक आय अर्जित करत हें, जेन ग्रामीण महिला मन के आत्मनिर्भरता के दिशा म एक उल्लेखनीय उपलब्धि हे।
डॉ. पेम्मासानी ह जनजातीय समुदाय के पारंपरिक स्वागत के सुरता करत कहिन के ऊंखर संग नृत्य करना अऊ स्थानीय संस्कृति ले आत्मिक रूप ले जुड़े के अनुभव अविस्मरणीय रहिस। उमन परीयना दिव्यांग आवासीय विद्यालय के दौरा के घलोक विशेष उल्लेख करिन अऊ उहाँ लइका मन ले होए आत्मीय बातचीत ल बहुत भावुक क्षण बताइन। उमन शासन कोति ले दिव्यांग लइका मन बर करे जात उदीम मन के प्रशंसा करिन। ए बेरा म मुख्यमंत्री के सचिव श्री पी. दयानंद उपस्थित रहिन।