बीस हजार ले जादा हितग्राही मन ल मिलही पक्का घर: केन्द्रीय मंत्री श्री तोखन साहू

मुंगेली, केन्द्रीय आवास अउ शहरी विकास राज्य मंत्री श्री तोखन साहू ह कहिन के प्रधानमंत्री श्री नरेन्द्र मोदी ह गरीब के सपना ल साकार करे के बाना उंचाए हें। तीसरइया पइत प्रधानमंत्री बनतेच उमन सबले पहिली 03 करोड़ आवास के स्वीकृति प्रदान करे हें। श्री साहू ह कहिन कि मुंगेली जिला म 20 हजार ले जादा हितग्राही मन ल पक्का घर मिलही। ओ मन आज मुंगेली म ‘‘हमर घर हमर विकास’’ के थीम उपर आयोजित आवास मेला ल सम्बोधित करत रहिन।
कार्यक्रम म उप मुख्यमंत्री श्री अरूण साव, जिला के प्रभारी मंत्री श्री लखन लाल देवांगन अऊ विधायक श्री पुन्नूलाल मोहले संग बहुत अकन जनप्रतिनिधि अऊ बड़ संख्या म हितग्राही सामिल होइन। आवास मेला म अतिथिय मन ह आवास योजना के 10 लाभार्थि मन ल स्वीकृति पत्र अउ 10 लाभार्थि मन ल गृह प्रवेश बर चाबी सौंपीन। कार्यक्रम म 09 लखपति दीदी मन ल घलोक सम्मानित करे गीस। मेला म सामुदायिक निवेश कोष अंतर्गत 09, चक्रीय निधि अंतर्गत 09, एन.आर.एल.एल बैंक लिंकेज अंतर्गत 09 अउ पीएम विश्वकर्मा योजनांतर्गत 05 हितग्राही मन ल लाभान्वित करे गीस।