रक्षाबंधन बर समूह के महिला मन बनावत हें सुंदर अऊ आकर्षक राखी
रायपुर, 11 जुलाई 2020। भाई-बहिनी के प्रेम अऊ विश्वास के चिनहा के परब रक्षाबंधन म ये साल भाई मन के कलाई म छत्तीसगढ़ म बने सुग्घर बांस अऊ गोबर ले तियार राखी सजही। ए सुंदर अऊ आकर्षक राखी मन ल धमतरी जिला के स्व-सहायता समूह के महिला मन तियार करत हें।
अइसन पहली पइत होवत हे के बड़का पैमाना म महिला मन भाइ मन बर नवा तरीका ले आकर्षक राखी तियार करत हें। प्रदेश के मुख्यमंत्री श्री भूपेश बघेल ह घलोक इंकर सराहना करे हें। मुख्यमंत्री के तारीफ ले उत्साहित महिला मन बड़ पैमाना म चार प्रकार के राखी बनावत हें। ये राखी आद्य बंधन के नाम ले तियार करे जात हे। एमां लइका मन बर राखी, बांस के राखी, गोबर के राखी अऊ भइया-भउजी बर कुमकुम-अक्षत बंधन राखी बनाए जात हे। ए राखी मन ल बाजार म 20 रूपिया ले 200 रूपिया के दाम म बेचे जाही।
